डोटीमा नेपाली अपहरण गर्ने भारतीय प्रहरीलाई सम्मानजनक तरिकाले छाडियो

समाचार

डोटी, १९ जेठ । नेपाली नागरिकको अपहरण गर्दा पक्राउ परेका भारतीय प्रहरीलाई विना कारबाही छोडिएको छ । दुई देशबीचको सम्बन्धको कुरा भन्दै नेपाली प्रहरीले उनीहरुलाई कुनै कारबाही नगरी भारतको जिम्मा लगाइएको हो । बिनाइजाजत नेपाल आएका भारतीय प्रहरीले धुधबार मध्यरातमा दिपायल सिलगढी नगरपालिका ८ लडागडाका लालबहादुर आउजीलाई अपहरण गरेका थिए ।

उनीहरुले आफ्नै घरमा सुतिरहेका लालबहादुरलाई कुटपिट गर्दै नाम्लोले हातखुट्टा बाँध्नुका साथै मुखमा पट्टी लगाएर गाडीमा हाली भारततर्फ लैजाने प्रयास गरेका थिए । स्थानीयले प्रहरीलाई खबर गरेपछि भारतीय टोली पक्राउ परेको थियो । खानतलासीको क्रममा उनीहरु भारतीय प्रहरी अधिकारी डिएसपी नागराजसहित नेतृत्वमा रहेको पुष्टि भएपछि उनीहरुलाई प्रहरीले सम्मानपूर्वक व्यवहार गरेको थियो ।

उनीहरुलाई महाकाली अञ्चल प्रहरी कार्यालयमार्फत भारतीय सीमा प्रहरीको जिम्मा लगाइएको सुदूरपश्चिम प्रहरी प्रमुख प्रहरी नायव महानिरीक्षक रोमेन्द्र सिंह देउजाले जानकारी दिए । ‘दुई देशको सम्वन्धको पनि कुरा आउँछ,’ उनले भने, ‘भारतीय प्रहरी भएको पुष्टि भइसकेपछि हामीले जताबाट आएका हुन्, उतै पठाइदियौं ।’

कुनै घटनाको अनुसन्धानका लागि भारतीय प्रहरी नेपाल आउन सक्ने भएपनि उनीहरु सूचना नदिएर आएको पाइएको उनले बताए । प्रहरी नायव महानिरीक्षक देउजा भन्छन्, ‘उनीहरुले सूचना नगरेर आएकोमा माफी मागिसकेका छन्, त्यसैले हामीले भारतीय प्रहरीलाई जिम्मा लगाएका छौं ।’ त्योभन्दा अरु कुनै कारवाही गर्ने कानुनी प्रावधान नरहेको देउजा बताउँछन् ।
डोटीका प्रमुख जिल्ला अधिकारी गोकर्णप्रसाद शर्माले पनि भारतीय प्रहरीलाई कारबाही नगरिएको पुष्टि गरे । ‘भारतीय प्रहरी हुन भन्ने पुष्टि भयो’ शर्माले भने ‘दुई देशको कुरा भएका कारण हामीले कारवाही गर्न नमिल्ने, माथिको आदेश जस्तो आयो त्यहीअनुसार गरियो ।’

नेपाली नागरिकको अपहरण गर्ने भारतीय प्रहरीलाई बिना कारबाही छोडिएको घटनामाप्रहरी चौतर्फी आलोचना भएको छ । सामाजिक सञ्जाल लगायतमा उनीहरुलाई अपहरण अन्र्तगत कारवाही हुनुपर्नेमा उल्टै सम्मानजनक रिहाई गरिएको भन्दै चर्को आलोचना भएको हो ।