दार्जिलिङमा फेरी एक गोर्खाल्याण्ड पक्षक्षरको गोली हानी हत्या, मारिनेको संख्या ८ पुग्यो

विश्व प्रवास

दार्जिलिङ, ३ साउन । गोर्खाल्याण्ड आन्दोलनमा मारिनेको संख्या ८ पुगेको छ । सोमबार राति भारतीय अर्धसैनिक बल (सिआरपीएफ) को गोली लागेर पश्चिम बंगालको नेपाल-भारत सीमावर्ती मिरिक बजारमा गोर्खाल्याण्ड पक्षधर एक जनाको ज्यान गएको छ । योसँगै गोर्खाल्याण्ड आन्दोलनमा मारिने संख्या ८ पुगेको हो ।

गोर्खाल्याण्डको पक्षधर गोर्खा जनमुक्ति मोर्चा र तृणमुल कांग्रेसका कार्यकर्ताबीच झडप हुन खोज्दा सिआरपीएफले चलाएको गोलीबाट मिरिकको मकरजुङ गाउँका ४५ बर्षीय आशिष तामाङको ज्यान गएको स्थानीय सञ्चारमाध्यमले जनाएका छन् । घटनामा पाँच जना भन्दा बढी घाइते भएका छन् । गम्भीर घाइतेलाई उपचारका लागि झापाको विर्तामोडस्थित विएन्डसी शिक्षण अस्तपाल ल्याईएको छ ।

सोमबार दार्जीलिङको मिरिकमा खुकुरी प्रहार गरी गम्भीर घाइते मिरिककै ३८ बर्षीय आनन्द तामाङको गम्भीर अवस्थामा विर्तामोडको विएन्डसी शिक्षण अस्पतालमा उपचार भइरहेको अस्पतालका जनरल सर्जन डा. रोहितकुमार यादवले जानकारी दिए । तामाङको घाँटी र दाहिने हातमा खुकुरी प्रहार गरेको गम्भीर चोट लागेको छ । अस्पतालका चिकित्सकहरु डा. बासु बाँस्कोटा र डा. सन्दीप अधिकारी नेतृत्वको टोलीले सोमबार राति नै विरामीको शल्यक्रिया गरेको थियो । गम्भीर घाइते तामाङ सीमा बजार पशुपतिनगरका केही सर्वसाधारणले उद्धार गरी विर्तामोड ल्याएका थिए ।

पश्चिम बंगालको सत्तारुढ त्रिणमूल कंग्रेसका कार्यकर्ता र गोर्खाल्याण्ड पक्षधरवीच सोमबार साँझ त्यहाँ झडप भएको थियो । दिउँसो मिरिक नगरपालिका वडा नम्बर ५ कृष्ण नगरको प्रहरी बुथमा अज्ञात समूहले आगजनी गरेपछि मोर्चा र तृणमुल कांग्रेसका कार्यकर्ता बीच झडपको अवस्था सिर्जना भएको थियो ।

दुवै समूहले एक अर्कालाई आगजनीको आरोप लगाएका थिए । साँझ आगजनीको विरोधमा गोर्खाल्याण्ड मुभमेन्ट कोअर्डिनेशन कमिटिमा आवद्ध दलका कार्यकर्ताले निकालेको र्‍यालीमा सहभागी र तृणमुल कांग्रेसका कार्यकर्ताबीच झडप हुन लागेपछि शुरक्षाकर्मीले हस्तक्षेप गर्दा गोली चलाएको प्रत्यक्षदर्शीले जनाएका छन् । घटनापछि मिरिकमा शुरक्षा व्यवस्था कडा पारिएको छ । यसअघि शुरक्षाकर्मीको गोलीबाट ७ जना सर्वसाधारणको ज्यान गईसकेको छ ।