भलिबल खेललाई राष्ट्रिय खेलको मान्यता प्रदान गरेको भन्दै प्रचण्डलाई भलिबल संघको सम्मान

खेलकुद

काठमाडौं, १५ साउन । नेपाल भलिबल संघले पूर्व प्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डलाई सम्मान प्रदान गरेको छ । संघका पदाधिकारीहरुले आइतबार बिहान प्रचण्ड निवास लाजिम्पाट पुगेर भलिबल खेललाई राष्ट्रिय खेलको मान्यता प्रदान गरेकोप्रति धन्यवादसहित सम्मान गरेका हुन् ।

त्यस अवसरमा प्रचण्डले नेपालको माटो र हावापानी सुहाउँदो लोकप्रिय खेल भएकाले भलिबल खेललाई राष्ट्रिय खेलको मान्यता दिइएको बताउँदै त्यतिले मात्र राज्यको जिम्मेवारी पूरा नहुने बताए । उनले भलिबललाई राष्ट्रिय खेलको रुपमा स्थापित गर्न सरकारले अन्तर्राष्ट्रिय स्तरका प्रतियोगिता, खेलाडीहरुको विकास र पूर्वाधार निर्माणमा विशेष ध्यान दिन जरुरी रहेको बताए ।

भेटमा संघका अध्यक्ष मनोरञ्जन शर्मा, उपाध्यक्ष निरोसी मास्के, महासचिव जितेन्द्रबहादुर चन्दलगायतका पदाधिकारीहरुले अध्यक्ष दाहाल सरकार भलिबल खेलका लागि स्वर्णिम काल भएको भन्दै यसले नेपालको भलिबल खेलमा गुणात्मक प्रगति हुने बताए ।