बाढी पहिरोले क्षतिग्रस्त सडक-पुल बनाउने जिम्मा नेपाली सेनालाई, कारण यस्तो छ

समाचार

काठमाडौं, ११ भदौं । सरकारले २ नम्बर प्रदेशमा हुने तेस्रो चरणको स्थानीय निर्वाचन अगावै बाढीपहिरोबाट क्षतिग्रस्त सडक–पुल मर्मत तथा पुनर्निर्माणको जिम्मा नेपाली सेनालाई दिने भएको छ । केही दिन अघिको वर्षाका कारण क्षतिग्रस्त बनेका सडक पुल मर्मत तथा पुनर्निर्माणको जिम्मा नेपाली सेनालाई दिने तयारी भईरहेको खबर आजको कान्तिपुरमा छ ।

सरकारको बुझाइ
सुरक्षा तथा सहज आवतजावतका लागि सडक, ढल, कुलो र गोरेटो बाटो मर्मत तथा पुनर्निर्माण द्रुत गतिमा गर्न सेनालाई जिम्मा दिन लागिएको हो । सेनामार्फत ती क्षेत्रमा पुनर्निर्माण र मर्मतको काम सहज हुने बुझाइ सरकारको छ ।

समन्वय गरी मर्मत
सेनाले सरकारको निर्देशनअनुसार जिल्ला निकायसँग समन्वय गरी मर्मत गर्नेछ । अहिले कैयन् स्थानमा मर्मतमा संलग्न भएकाले पनि सबै क्षेत्रमा सेनालाई नै जिम्मा दिने गरी प्रक्रिया अघि बढाइएको हो ।

सेनालाई किन ?
सेनामार्फत काम गराउँदा निर्वाचनको सुरक्षा तथा काममा सहज हुने विश्वास सरकारको छ । तराईमा हुने काम स्थानीय निकायले गर्दा ढिलाइ हुने र अधिकांश काम कागजमा मात्र पूरा हुने विगतको अनुभवका आधारमा यस्तो निर्णयमा सरकार पुगेको भौतिक पूर्वाधार मन्त्रालयका एक अधिकारीले बताए ।