रेणु दाहालसँग पराजित देवीको प्रकाशसँग सेल्फी, प्रचण्डसँग के कुरा भयो ?

प्रदेश

काठमाडौं, ८ कात्तिक । भरतपुर महानगरको मेयरमा माओवादी अध्यक्षकी छोरीसँग पराजित भएका एमाले नेता देवी ज्ञवाली एकाएक चर्चामा आएका छन् । बुधबार एकाबिहानै माओवादी अध्यक्ष प्रचण्ड र एमाले अध्यक्ष केपी ओलीलाई भेट्न बालकोट पुगेपछि ज्ञवाली चर्चामा आएका हुन् । माओवादी केन्द्रका अध्यक्ष पुष्पकमल दाहाल प्रचण्डकी छोरी रेणु दाहालसँग पराजित भएपछि देवी प्रचण्डसँग रुष्ट बनेका थिए । तर बुधबार एकाएक प्रचण्ड र एमाले अध्यक्ष केपी ओलीलाई भेट्न बालकोट पुगेका छन् ।

ज्ञवालीले ओली निवास भक्तपुर बालकोटमा बुधबार बिहान दुवै नेतासँग भेटवार्ता गरेका छन् । दुवै नेताले भेट्न खोजेपछि आफू चितवनबाट काठमाडौं आएको ज्ञवालीको भनाई छ । ‘आउँदो चुनावको तयारीबारे दुवै शीर्ष नेताहरुले भेट्न खोजेपछि म आएको हुँ’ ज्ञवालीले भने । नेताहरुसँग सामान्य कुराकानी र सामुहिक तस्बिर लिने काम भएको ज्ञवालीको भनाई छ ।

भेटमा ओली र प्रचण्डले स्थानीय चुनावपछि ज्ञवालीले उच्च राजनीतिक चरित्र देखाएको भन्दै प्रशंसा गरेका थिए । ‘मलाई उहाँहरुले प्रशंसा गर्दै आउँदो चुनावमा चितवनबाट वामपन्थी गठबन्धनलाई जिताउन तपाईंको भूमिका महत्वपूर्ण छ भन्दै जिम्मेवारी पनि दिनुभएको छ’ ज्ञवालीले भने ।

स्थानीय चुनावमा भरतपुरमा माओवादी उम्मेदवार रेणु दाहाल विजयी भएसँगै एमाले र माओवादीबिचको सम्बन्ध चिसो भएको थियो । आउँदो प्रतिनिधिसभा चुनावमा प्रचण्ड चितवन क्षेत्र नम्बर ३ बाट उठ्ने भएपछि एमालेको समर्थनमा आशंका उत्पन्न भैरहेको बेला दुवै नेताले ज्ञवालीसँग भेट गरेका हुन् ।

पहिलेको सबै कुरा बिर्सेर वामपन्थी गठबन्धनलाई बलियो बनाउन आफू लाग्ने बताए । ‘राजनीतिमा पहिलेको कुरा बिर्सेर भने, ‘चितवनमा वामपन्थी गठबन्धनबाट उठ्ने जोकोहीलाई जिताउनु मेरो जिम्मेवारी हो ।’ ओली र प्रचण्डलाई भेट्न गएका ज्ञवालीसँग प्रचण्डका छोरा प्रकाश दाहालले समेत फोटो खिचाएका छन् । प्रकाशले आफ्नो फेसबुक पेजमा फोटो राख्दै वाम एकताले पैदा गरेको निकटता भनेका छन् ।