यस्तो छ एमाले–माओवादी सिध्याउने कांग्रेसको गोप्य प्लान

राजनीति

काठमाडौं, १० कात्तिक । नेपाली कांग्रेसले समयमै नसच्चिए वाम गठबन्धन सिद्धिने चेतावनी दिएको छ । कांग्रेसलाई सिद्धाउने नियतले गठन भएको वाम गठवन्धन आफै सिद्धिने कांग्रेसको ठहर छ । वाम गठबन्धनमा आवद्ध नेकपा एमाले र माओवादीले कांग्रेसविरुद्ध विभिन्न षडयन्त्रहरु गरिरहेको आरोप लगाउँदै कांग्रेस प्रचार समिति संयोजक बालकृष्ण खाँडले उनीहरु आफै सिद्धिने जिकिर गरे ।

शुक्रबार प्रधानमन्त्री निवास बालुवाटारमा पत्रकार सम्मेलन गर्दै खाँडले भने, ‘पञ्चायतले कांग्रेस सिध्याउँछु भन्दाखेरि कांग्रेस सिद्धिएन, लोकतन्त्र सिद्धिएन, पञ्चायत सिद्धियो । राजाले कांग्रेस सिध्याउँछु भन्दाखेरि राजतन्त्र सिद्धियो । आज एमाले र माओवादीले कांग्रेस सिध्याउँछु, लोकतन्त्रलाई सिध्याउँछु, संसदीय व्यवस्थालाई उल्टाउँछु भन्दाखेरि संसदीय व्यवस्था उल्टिन्न, लोकतन्त्र सिद्धिन्न, कांग्रेस सिद्धिन्न, सिद्धिन्ने पालो एमाले र माओवादीको आएको छ ।’

उनले वाम गठवन्धन कांग्रेसका लागि अवसर र चुनौति दुवै भएको बताए । उनले भने, ‘हिजो राजतन्त्र समाप्त गर्ने हामीलाई अवसर मिल्यो । आज नेपालका कम्युनिष्टहरु निरंकुश हुने क्रममा अघि बढ्दाखेरि उनीहरु समाप्त हुने दिन आइसक्या छ ।’

नेता खाँडले निर्वाचनमा नेपाली जनताको साथ पाउने र कांग्रेसको पूर्ण बहुमत आउने विश्वास व्यक्त गरे । ‘प्रदेशमा पनि हाम्रो बहुमत आउने छ, केन्द्रमा पनि हाम्रो बहुमत आउने छ,’ नेता खाँडले भने, ‘कांग्रेसको प्रधानमन्त्रीत्वमा, सातवटै प्रदेशमा मुख्यमन्त्रीत्वमा निर्वाचनपछि कांग्रेसको सरकार बन्नेछ ।’