एमाले र माओवादीको दोस्रो चरणमा निर्वाचन हुने क्षेत्रको सिट बाँडफाँड समेत टुंगियो

प्रदेश

काठमाडौं, १५ कात्तिक । दोस्रो चरणमा निर्वाचन हुने क्षेत्रहरुमा नेकपा एमाले र नेकपा माओवादी केन्द्रले सिट बाँडफाँड गरेका छन् । मंसिर २१ गते हुने प्रतिनिधिसभा तथा प्रदेशसभा चुनावका लागि वाम गठबन्धनले सिट बाँडफाँड टुंग्याएका हुन् । सहमतिअनुसार दोस्रो चरणको चुनावमा प्रतिनिधिसभातर्फ एमालेलाई ७६, माओवादीलाई ४६ तथा बाँकी ६ सिट राष्ट्रिय जनमोर्चा, हृदयश त्रिपाठी लगायतलाई छुट्याइएको छ ।

यसअघि पहिलो चरणमा एमालेले २१ र माओवादीले १६ सिट लिएका थिए । प्रतिनिधिसभाका कुल १६५ सिटमध्ये एमालेको भागमा ९७ र माओवादी केन्द्रको भागमा ६२ परेको छ । यस्तै प्रदेशसभातर्फ कुल ३३० सिटमध्ये एमालेको भागमा १९८ र माओवादीको भागमा १२८ छ ।

विवादित जिल्लामा यसरी मिल्यो भागवण्डाः

झापा, चितवन, दाङ, सल्यान र उदयपुरमा देखिएको विवाद सल्ट्याउँदै दुई दलले बाँडफाँड टुंग्याएका हुन् । चितवन २ बाट एमालेका जिल्ला अध्यक्ष कृष्णभक्त पोखरेल उम्मेदवार बन्नेछन् । त्यही क्षेत्रमा दाबी गरेका माओवादी केन्द्रका नेता रामबहादुर थापा काठमाडौं १० बाट उठ्ने सहमति भएको छ ।

प्रकाश ज्वाला प्रदेश ६ को मुख्यमन्त्रीका दावेदारः
यस्तै सल्यानमा प्रतिनिधिसभातर्फ माओवादीका टेकबहादुर बस्नेत उम्मेदवार बन्न लागेका छन् । सल्यानका दुवै प्रदेशमा भने एमालेका प्रकाश ज्वाला र गुलाबजंग शाह उठ्ने भएका छन् । ज्वालालाई प्रदेश ६ को मुख्यमन्त्रीका दावेदारका रुपमा एमालेले उठाउने भएको हो ।

एमाले सचिव शंकर पोखरे प्रदेश ५ को मुख्यमन्त्रीः

दाङ २ मा माओवादीका कृष्णबहादुर महरालाई प्रतिनिधिसभाको उम्मेदवार बनाउने सहमति भएको छ । त्यही क्षेत्रमा दावी गर्दै आएका एमाले सचिव शंकर पोखरेलाई गठबन्धनका तर्फबाट प्रदेश ५ को मुख्यमन्त्री बनाउनेगरी प्रदेशसभाको उम्मेदवार बनाउने तयारी छ ।

झापा तीनमा वामले राप्रपालाई सघाउनेः
यस्तै झापा १ मा माओवादी तथा २, ४ र ५ मा एमालेलाई दिनेगरी बाँडफाँड टुंगो लागेको छ । झापा ३ मा भने राप्रपालाई सघाउने दुई दलबिच समझदारी भएको छ । कांग्रेसले झापा ३ नछोड्ने भएपति त्यहाँ राप्रपा कांग्रेससँग असन्तुष्ट छ ।

कांग्रेससँग असन्तुष्टी जनाउँदै उम्मेदवारी दिन लागेका राप्रपा महामन्त्री राजेन्द्र लिङदेनलाई वाम गठबन्धनले सघाउन लागेका हुन् । सुर्खेतमा प्रतिनिधिसभाका दुवै क्षेत्रमा एमाले तथा प्रदेशसभामा माओवादीको तर्फबाट उम्मेदवारी दिने सहमति छ ।

दैलेखमा प्रतिनिधिसभाका दुवै क्षेत्र तथा प्रदेशसभाका तीनवटा क्षेत्र एमालेले लिने टुंगो लागेको छ । प्रदेश १ को क भने माओवादीले लिने सहमति भएको छ । दुवै दलका नेताहरुको दावीका कारण टुंगो लगाउन नसकिएका जिल्लाहरुमा एउटा नेतालाई प्रदेश र अर्कोलाई प्रतिनिधिसभा उम्मेदवार बनाएर बाँडफाँड गरिएको हो ।