प्रतिनिधिसभाका २० क्षेत्रको मतपरिणाम आउन बाँकी, वामको दुई तिहाई पुग्ने निश्चित

प्रदेश

काठमाडौं, २५ मंसिर । प्रतिनिधिसभा सदस्य तर्फ २० क्षेत्रको मतपरिणाम आउन बाँकी रहेको छ । १६५ सिट रहेको प्रतिनिधिसभा सदस्यमा अब २० क्षेत्रको मात्र परिणाम आउन बाँकी रहेको हो । सोमबार विहानसम्म १४४ निर्वाचन क्षेत्रको नतिजा सार्वजनिक भईसकेको छ । अहिलेसम्मको नजिता हेर्दा एमाले माओवादीको वाम गठबन्धनलाई प्रत्यक्षतर्फ दुई तिहाई पुग्ने निश्चित देखिएको छ । मतगणना जारी रहेका २० मध्ये ११ स्थानमा वाम गठबन्धनको अग्रता रहेकाले दुई तिहाई निश्चित भएको हो ।

पछिल्लो परिणाम अनुसार नेकपा एमाले एक्लैले हालसम्म ७५ सिट जितेको छ । यसमा सूर्य चिन्ह लिएर चुनाव जितेका हृदेश त्रिपाठी र बृजेश कुमार गुप्ताको स्वतन्त्र मधेशी समूह पनि जोडिएको छ । प्रत्यक्षतर्फ दुई तिहाइ ल्याउन वामपन्थीले ११० सिट जित्नुपर्ने हुन्छ ।

एमालेले ६ ठाउँमा अग्रता लिइरहेको छ । अग्रता लिनेमा सुनसरी ३ मा भगवती चौधरी, संखुवासभामा राजेन्द्र गौतम रहेका छ । काभ्रेपलान्चोक २ मा गोकुल बास्कोटा विजयी भएका छन् । त्यस्तै, स्याङ्जा १ मा नारायण मरासिनी, स्यांजा २ मा पद्मा अर्याल, कैलाली २ मा झपट रावल र कञ्चनपुर ३ मा दिपकप्रकाश भट्टले अग्रता लिइरहेका छन् ।

प्रत्यक्षतर्फ दोस्रो स्थानमा माओवादी केन्द्र रहेको छ । माओवादीले हालसम्म ३१ सिट जितेर ५ ठाउँमा अग्रता लिइरहेको छ । सर्लाही ३ मा रामेश्वर राय, चितवन ३ मा प्रचण्ड, अर्घाखाँचीमा टोपवहादुर रायमाझी, धनुषा १ मा मात्रिका यादव र सिरहा २ मा सुरेशचन्द्र दासले अग्रता लिइरहेका छन् ।

२०७० सालको निर्वाचनमा पहिलो दल बनेको नेपाली कांग्रेस प्रतिनिधिसभामा प्रत्यक्षतर्फ तेस्रो स्थानमा झरेको छ । उसले अहिलेसम्म १८ सिटमा विजय हासिल गर्दा २ ठाउँमा अग्रता लिइरहेको छ । यी सबै ठाउँमा जित्दा पनि उसले २५ सिटभित्र सीमित हुनुपर्ने देखिन्छ । कांग्रेसका सिताराम मेहता सुनसरी २, प्रदिप गिरी सिरहा १ मा अग्रता लिईरहेको छ । नवलपरासी २ बाट देवेन्द्रराज कँडेल विजयी भईसकेका छन् ।

त्यस्तै, संघीय समाजवादी फोरम ७ सिट जितेर चौथो स्थानमा रहेको छ । फोरमले २ ठाउँमा अग्रता लिइरहेको छ । महोत्तरी ४ मा सुरेन्द्र यादव र पर्सा ३ मा हरिनारायण रौनियारले अग्रा लिइरहेका छन् । राजपा नेपाल ७ स्थान जितेर पाँचौ भइरहँदा ३ ठाउँमा अग्रता लिइरहेको छ । राजपाका रेशलाल चौधरीले कैलाली १ र राकेश मिश्रले सर्लाही ४ मा अग्रता लिइरहेका छन् ।

राप्रपा, राष्ट्रिय जनमोर्चा र नयाँ शक्ति पार्टीले एक एक सिट जितेका छन् भने स्वतन्त्रबाट हुम्लामा माओवादीका पोलिटव्यूरो सदस्य छक्कवहादुर लामा बागी उम्मेदवारका रुपमा बिजयी भएका छन् । नेपाल मजदूर किसान पार्टीले भक्तपुर १ मा अग्रता लिइरहेको छ ।

अहिले सम्मको मतपरिणाम हेर्दा केन्द्रमा वाम गठबन्धनको बहुमत सरकार बन्ने निश्चित छ । त्यस्तै २ नम्बर प्रदेश बाहेकमा पनि वाम गठबन्धनकै प्रदेश सरकार निर्माण हुने निश्चित प्रायः छ । नेपाली कांग्रेसले कुनै पनि प्रदेशमा सरकार गठन गर्न सक्ने छैन् । २ नम्बर प्रदेशमा संघीय समाजवादी फोरम र राष्ट्रिय जनता पार्टी (राजपा) नेपालले प्रदेश सरकार बनाउने निश्चित छ ।