राष्ट्रियसभा निर्वाचन, एमालेमा चौगुना नाम सिफारिस

समाचार

- पूर्वसांसद तथा पूर्वमन्त्री समेत सिफारिसमा

काठमाडौं । राष्ट्रियसभा उम्मेदवारका लागि एमालेका प्रदेश कमिटीले चार गुणा नाम सिफारिस गरेका छन् ।

वाम गठबन्धनले जित्ने निश्चित भएका ४३ सिटमध्ये एमालेको भागमा २९ सिटमा तोकिए भन्दा धेरै सिफारिस आएको हो । पूर्वसांसद तथा पूर्वमन्त्री समेत सिफारिसमा परेका छन् ।

धेरै नाम पठाउँदा उम्मेदवार छनोट गर्न कठिन भएको एमाले सचिव प्रदीप ज्ञवालीले बताए। ‘प्रदेश १ र २ बाट धेरै सिफारिस आएका छन्। एउटा सिटमा ३ जनाको सिफारिस गर्न भनिएकोमा धेरै सिफारिस आएको छ । मापदण्डभित्र रहेर छनोट गरिने छ’ उनले भने। उनले एमालेको स्थायी समितिको सोमबारको बैठकले प्रदेशबाट सिफारिस नामको टुंगो लाग्ने बताए। माघ १० गते राष्ट्रियसभा निर्वाचनका लागि उम्मेदवारको कार्यतालिका छ ।

स्थायी समितिले राष्ट्रियसभा सदस्यका लागि योग्यता पुगेका, पार्टीमा लामो योगदान गरेका, समाजसेवा, संस्कृति, कला, साहित्य, विज्ञान, प्रविधिलगायत क्षेत्रमा योगदान पुर्याएका तथा स्थानीय, प्रदेशसभा र प्रतिनिधिसभा निर्वाचनमा नउठेका तथा समानुपातिक सूचीमा नपरेका, विज्ञ तथा विशेषज्ञ छनोट गर्न प्रदेश कमिटीलाई जिम्मा दिएको थियो।