‘हारेको त कांग्रेस हो’ भन्दै प्रधानमन्त्री देउवाले लेखे राष्ट्रपतिलाई राजीनामा पत्र

प्रदेश

- ईश्वर अर्याल

काठमाडौं, १६ माघ । यतिबेला नेपाली कांग्रेस सभापति एवं प्रधानमन्त्री शेरबहादुर देउवा सबैको चर्चामा छन् । निर्वाचनमा पार्टी पराजित गराएको आरोप लगाउँदै कांग्रेस नेता कार्यकर्ताहरुले पार्टी सभापतिबाट देउवाको राजीनामा माग गरिरहेका छन् ।

त्यस्तै एमाले कांग्रेस लगायतका पार्टीहरुले पनि प्रधानमन्त्रीबाट राजीनामा दिन माग गरिरहेका छन् । तर देउवा भने कुनै निकास नदिई राजीनामा नदिने अडानमा छन् । यस्तै अवस्थामा देउवामाथि व्यंग प्रहार गर्दै लेखक ईश्वर अर्यालले प्रधानमन्त्रीको राजीनामा लेखेका छन् । हेरौं यस्तो छ उनले लेखेको व्यंगात्मक राजीनामा पत्रः

सम्माननिय राष्ट्रपति ज्यु !

बिषयः राजिनामा दिने सन्दर्भमा

उपर्युक्त बिषयमा म शेर बहादुर देउवा यस मुलुकको प्रधानमन्त्रीको रुपमा बहाल रहेको कुरा त यहाँले मलाई सपथ गराएदेखी नै थाहा होला । अझ ६४ सदस्यीय मन्त्रीपरिषद बिस्तार गर्दा त ठुलै होहल्ला भएको थियो, यहाँलाई थाहा नहुने कुरै भएन ।

कम्युनिष्ट अधिनायकवाद ल्याउन भनेर कस्सिएका एमाले र माओवादी केन्द्रको गठबन्धन भएपछी चुनावमा नराम्रोसंग पराजय भोगियो, भनेर भन्देखुन लाई । अब प्रतिपक्षीहरु र हुँदा हुँदा आफ्नै पार्टीकाले पनि राजिनामा दे, राजिनामा दे भन्दै हिँड्या छन् । अरे बाबा, हारेको त कांग्रेस हो, मैले त धेरै मत ल्याएर जितेको छु नी, किन राजिनामा दिनु ?

यस्तो अप्ठेरो परेको बेलामा लोकतन्त्र लगेर बुझाउने ठाउँ छैन । ज्ञानेन्द्रलाई बुझाउँ, उनी नागार्जुनतिर कहाँ बस्छन था छैन । दिल्लीलाई बुझाउँ भने मैलाई देश निकाला गर्लान भन्ने पीर छ । ज्योतिषीले सातपटक प्रधानमन्त्री हुन्छस भन्थे, यहाँ सात दिन टिक्न नदेलान जस्तो भैसक्यो । अरे बाबा ! अर्को बालुवाटार बनाएर त्यहिँ बसे भैहाल्यो नी । दुईवटा प्रधानमन्त्री हुन्नन भनेर संबिधानमा लेख्या छैन क्यारे ।

त्यही पनि यो राजिनामा लेखेर गोजीमा राखेर हिँड्या छु । हारेकालाई ‘पराजित’ भन्नेहरुसंग मेरो असहमती छ । ‘उपबिजेता’ या ‘सहबिजेता’ भन्दिए कसको के जान्थ्यो र भनेर भन्देखुनलाई ?

राष्ट्रपति निवाससम्म राजीनामा ल्याउने मेरो हिम्मत भएन । कसैले मेरो कोटको गोजीबाट बरामद गरेर ल्याईदियो भने स्विकार गरियोस भन्न चाहन्छु ।

उहि भवदिय प्रधानमन्त्री
शेर बहादुर देउवा

(देउवाले साच्चिकै राजिनामा भने दिएका छैनन्)