डा. केसीको वकिललाई ‘ज्यानमार्ने धम्की’ बारे प्रधानन्यायाधीशमाथि अनुसन्धान सुरु

समाचार

काठमाडौं, १७ माघ । ज्यान मार्ने धम्की दिएको आरोप लागेपछि प्रहरीले प्रधानन्यायाधीश गोपाल पराजुलीमाथि अनुसन्धान सुरु गरेको छ । प्रधानन्यायाधीश पराजुलीले आफूलाई ज्यान मार्ने धम्की दिएको भन्दै वरिष्ठ अधिवक्ता डा. सुरेन्द्र भण्डारीले बुधबार जिल्ला प्रशासन कार्यालय काठमाडौंमा निवेदन दिएका थिए ।

उनको निवेदन पछि जिल्ला प्रशासन कार्यालयले छानबिन गर्न महानगरीय प्रहरी परिसर काठमाडौंलाई भनेको छ । प्रमुख जिल्ला अधिकारी केदारनाथ शर्माले परिसरलाई पत्राचार गरेसँगै प्रहरीले छानबिन सुरु गरेको हो । सीडिओ शर्माले भने, ‘यो ठूलो केस भएकाले सुरक्षा थेट हो कि होइन, परिसरलाई पठाएको छु ।’

अधिवक्ता भण्डारीले निवेदनमा प्रधानन्यायाधीश पराजुलीले आफूलाई फोन गरेको नम्बर पनि उल्लेख गरेका छन् र कल डिटेल मगाउन माग गरेका छन् । प्रजिअले तोक लगाएर पठाएपछि परिसरले सम्वन्धित निकायसँग कल डिटेल मागेको छ । साथै छानविनका लागि महानगरीय प्रहरीवृत्त बानेश्वरलाई पत्र पठाइएको एसपी रविन्द्र धानुकले जानकारी दिए । ‘घटनाका विषयमा आवश्यक कार्यका लागि हामीले बानेश्वर प्रहरीलाई निर्देशन दिएका छौं,’ एसएसपी धानुकले भने।

http://news-nepal.com/737812/