पार्टीको स्थायी कमीटिको बैठकमा प्रचण्डले भने बजेट राम्रो आएन

अर्थ र बाणिज्य

नेपाल कम्युनिष्ट पार्टी(नेकपा) बैठकमा सरकार र बजेटको आलोचना भएको छ। सरकारले देखिने तथा संस्थागत काम नगरेको भन्दै स्थायी समिति सदस्यहरुले सरकारको आलोचना गरेका हुन्।

बालुवाटारमा बसेको बैठकमा स्थायी समिति सदस्यहरुले सरकार प्रभावकारी नभएको, बजेट राम्रो नआएको तथा बजेट विनियोजन भेदभावपूर्ण भएको बताएका थिए। सरकार र बजेटमाथि स्थायी समिति सदस्यहरुले आलोचना गर्न थालेपछि प्रधानमन्त्री एवम् अध्यक्ष ओलीले रुलिङ गर्दै छलफल पार्टीको नियमावलीमा केन्द्रीत गर्न आग्रह गरेका थिए।

आलोचना सुरु भएपछि नेकपाका मन्त्रीहरु टाउको निहुराएर बसेका थिए। नेकपाका धेरै स्थायी समिति सदस्य मन्त्री छन्। नेकपाले पार्टी संगठनको नियमावलीका विषयमा छलफल गर्न बैठक डाकेको थियो।

‘सरकारको सडकमा पनि सदनमा पनि हामीले प्रतिरक्षा गर्न सक्ने काम गर्नुपर्‍यो भनेर कुरा राखेका छौँ’, एक स्थायी समिति सदस्यले न्युज नेपालसँग भने, ‘संस्थागत, टिमबद्ध र देखिनेगरि काम गर्न सुझाव सथाीहरुबाट आए।‘

स्थायी समिति सदस्यहरुले बजेटबारे धारणा राखेपछि अर्का अध्यक्ष पुष्पकमल दाहाल प्रचण्डले समेत बजेट प्रति असन्तुष्टि राखेका थिए।

‘बजेट राम्रो आएन। बजेटका प्रति असन्तुष्टिका कारण पार्टी पंक्ति र संसदीय दल एकताबद्ध भएर लडेको छैन भनेर प्रचण्डले धारणा राख्नुभयो’, एक स्थायी समिति सदस्यले न्युज नेपालसँग भने, ‘असन्तुष्टि कस कसको के के छ कुरा गर्नुपर्‍यो भन्नुभयो।‘

प्रचण्डपछि धारणा राख्ने क्रममा प्रधानमन्त्री ओलीले सरकारले प्रभावकारी काम गर्ने कोशिस गरिरहेको बताएका थिए।

‘कोशिस गर्दैछौ, चीन र भारतसित पनि कुरा हुदैँछ। कतिपय काम हामीले एक्लै गर्छौ भन्दा सक्ने अवस्था छैन भनेर प्रधानमन्त्रीले जवाफ दिनुभयो’, ती स्थायी समिति सदस्यले सेतोपाटीसँग भने, ‘बजेट सानो आकारको भएका कारण धेरै काम गर्न सकिएन। पैसा नभएर हो। स्रोत खोज्दै छौँ। मिलाउँछौँ भन्ने उहाँको कुरा थियो।‘ ओलीले सरकारको आलोचना सुरु भएको प्रति असन्तुष्टि व्यक्त गरेका थिए।

‘एकप्रकारको घेराबन्दी सुरु भएको छ’, ओलीको भनाई उदृत गर्दै ती स्थायी समिति सदस्यले भने, ‘हामीलाइ बदनाम गर्न सबै लागेका छन् भन्ने कुरा राख्नुभयो।‘

ओलीले भारत र चीन भ्रमणबारे समेत ब्रिफिङ गरेका थिए। नेकपाका प्रवक्ता नारायणकाजी श्रेष्ठका अनुसार प्रधानमन्त्रीले बैठकमा सरकारले स्वतन्त्र परराष्ट्र नीति कार्यान्वयन सुरु गरेको तथा दुइ देशका भ्रमणका उपलब्धि देखिदैँ जाने बताएका थिए।

‘कतिपय सन्धि सम्झौता नेपालको हितमा गर्न सफल भएको जानकारी गराउनुभयो’, श्रेष्ठले भने।

बैठकमा नेकपाको संगठन, जनवर्गिय संगठनका नियमावलीबारे सदस्यले सुझाव राखेको बैठकपछि श्रेष्ठले पत्रकारहरुलाई बताए।

बैठकमा प्रचण्डले छिटो भन्दा छिटो तल्ला पार्टी कमिटी समायोजन गर्नुपर्ने धारणा राखेका थिए। ‘स्थानिय निकाय र प्रदेशमा गरेका राम्रो कामबारे जनतालाई सम्प्रेषण गर्न पार्टी भएन भने गाह्रो हुन्छ भनेर प्रचण्डले भन्नुभयो’, एक स्थायी समिति सदस्यले भने, ‘छिटो छिटो एकता प्रक्रिया टुङ्ग्याउँ भन्ने कुरा थियो।‘

नेकपाले अर्को बैठकमा सरकारको काम र स्थानीय तहका गितिविधीबारे छलफल गर्ने श्रेष्ठले बताए।