अमेरिका र संयुक्त राष्ट्रले दिए चेतावनी,सिरियामा पुनः हमलाको तयारी

राजनीति

संयुक्त राष्ट्रले रुस र टर्कीलाई सिरियामा विद्रोहीको कब्जामा रहेको अन्तिम पकड क्षेत्र इदलिब प्रान्तमा सम्भावित विध्वंश रोक्नका लागि तत्काल कारवाही गर्न आदेश दिएको छ ।

सिरियाली राष्ट्रपति बशर अल असदको सेना रुसको समर्थनमा घना जनसंख्या भएको इदलिबमा आक्रामक सैन्य कारवाहीको योजना बुनिरहेको भन्ने खबर सार्वजनिक भएसँगै संयुक्त राष्ट्रले यस्तो चेतावनी दिएको हो ।

यसअघि रुसी विमानले इदलिबको मुहमबल र जदरायामा हमला गरेको जसमा बच्चासहित नौजनाको मृत्यु भएको खबर सार्वजनिक भएको छ ।

यहाँका स्थानीय अबू मोहम्मदले बिहान ११ बजेदेखि बेलुका चारबजेसम्म हवाई हमला भएको जानकारी दिए ।

यस्तै अर्का स्थानीय अहमदले घटनाको विवरणबारे जानकारी दिँदै भने, ‘विमान हाम्रो घर नजिकै आउँदा हामी घरमा नै थियौं । हामी डरायौं र घर छोडेर भाग्यौं । मलाई अन्यलाई पनि घर खाली गर्न लगाएँ । मलाई थाहा थियो कि रुसले पुनः हमला गर्नेछ । यस्तै भयो । उनीहरुले विमानमार्फत निकै तगडा हमला गरे र तेस्रो पटकमा पूरा घर ध्वस्त भयो । ’

यसैबीच संयुक्त राष्ट्रका शान्ति दूत स्टाफन डे मिस्टुराले टर्कीका राष्ट्रपति रेचेप तैयप एर्दोआन र रुसी राष्ट्रपति भ्लादिमिर पुटिनले यसबारे छलफल गर्नुपर्ने बताएका छन् ।

संयुक्त राष्ट्रमा विशेष सल्लाहकार र सिरियामा विशेष दूत यान एगल्याण्डले एक पत्रकार सम्मलेनमा भने, ‘इददिबमा साँच्चै नै अब एक मानवतावादी र राजनीतिक रणनीतिको आवश्यकता छ र यदि यस्तो हुन सके लाखौंको ज्यान बच्ने थियो । यदि यो असफल भए अबको केही दिन वा घण्टाभित्र हामीले यस्तो युद्ध देख्नेछौं जुन पछिल्ला युद्धभन्दा क्रुर हुनेछन् । ’

‘त्यसकारण हामी अन्त्यमा तपाईं सबैलाई समझदारीको अपिल गर्दछौं । यो समझदारीको अर्थ यो हुनेछ कि हामी ती सबै कुरा दोहोराउँदैनौं जुन पूर्वी अल्लेपो, पूर्वी गूटा र रक्कामा भएको थियो । शहरका बासिन्दालाई हत्या गरेर शहरलाई बचाउनुको कुनै अर्थ छैन,’ उनले भने ।

‘इदलिबमा जुन डर फैलिएको छ, त्यसमा विश्वास गर्न मुश्किल छ । पूरा इलाका चारैतर्फबाट सेनाले घेरिएको छ र बीचमा मानिसहरु छन् । उनीहरुलाई हरदम गोलीबारीको शिकार हुने हो भन्ने डर छ । यहाँ करिब ३० लाख मानिसहरु बस्छन् जसमध्ये १० लाख बच्चाहरु छन् । त्यसकारण हामीले जसरी पनि इदलिबमा हुन लागेको युद्ध रोक्नुपर्छ । यहाँ पहिले नै लाखौं मानिसहरु आफ्नो घर छोड्न बाध्य छन् । इदलिबमा युद्ध गर्नु भनेको कुनै शरणार्थी शिविरमा हमला गर्नु सरह हो ।’

संयुक्त राष्ट्रकी अमेरिकी दूत निकी हेलीले इदलिबको स्थिती अत्यन्तै गम्भीर त्यहाँको चिच्याहट र पुकार आफूले पनि सुनिरहेको बताएकी छिन् ।

उनले भनिन्, ‘रुसले सबै आरोप ह्वाइट हेलमेट्सको टाउकोमा थोपरेको छ र असद पनि यही गरिरहेका छन् । जब असदले आफ्नै जनतामाथि रासायनिक हमला गर्ने तयारी गर्छन्, उनले सधैं यस्तै गर्छन् । तपाईंले इरान, रुस र असदका लागि राष्ट्रपति ट्रम्पको चेतावनी सुन्नुभएको छ । हामी यो स्विकार गर्दैनौं । संयुक्त राष्ट्र सुरक्षा परिषद् इदलिबका जनतामाथि रासायनिक हमलालाई अनुमती दिन सक्दैन् । सिरियाका जनताले पहिले नै अत्यधिक पीडा झेलिसकेका छन् । यो त्रासदीपूर्ण स्थिती हो ।’

अमेरिकाले पहिले नै भनिसकेको छ कि असदको सेनाले मानिसहरुमाथि रासायनिक हतियारले हमला गरे यसविरुद्ध ‘उचित र तत्काल’ जवाफी कारवाही गर्नेछ ।

ट्रम्पले एक दिन अघि सिरियाली सरकारसमेत इरान र रुसलाई चेतावनी दिएका थिए । उनले भनेका थिए, ‘यदि उनीहरु विद्रोहीको कब्जा भएकमो इदलिबमा हमला गर्छन् भने यो मानवताप्रति गम्भीर अपराध हुनेछ । इदलिबमा हमला भए हज्जारौंको हत्या हुनेछ ।’

ट्रम्पले बुधबार ट्वीट गरेर असदले इदलिबमा सोचबिचार बिना हमला गर्नु नहुने बताएका छन् ।

Donald J. Trump

✔@realDonaldTrump

President Bashar al-Assad of Syria must not recklessly attack Idlib Province. The Russians and Iranians would be making a grave humanitarian mistake to take part in this potential human tragedy. Hundreds of thousands of people could be killed. Don’t let that happen!

यस्तो अर्कोतिर, सिरियाको सरकारी टेलिभिजन च्यानलले इजराइलको युद्ध विमानले देशको उत्तर–पश्चिम इलाकास्थित सैन्य इलाकामा निशाना बनाएको बताएको छ ।

टिभी च्यानलले एक अधिकारीलाई उद्धृत गर्दै एक युद्ध विमान हमा र टाटूर्स प्रान्तमा निकै कम उचाईमा उडिरहेको देखिएको बताएको छ । अधिकारीका अनुसार केही इजराइली मिसाइललाई खसालिएको छ र केहीले त्यहाँबाट हट्न बाध्य बनाइएको छ ।

इजराइलले यो रिपोर्टमाथि अहिलेसम्म कुनै प्रतिक्रिया दिएको छैन