तिहार नआउँदै फूल झर्न थालेपछि किसान चिन्तित

समाचार

काठमाडौँ । तिहार गतवर्षको भन्दा पक्कै पनि ढिला भएको हो । नेपाल पञ्चाङ्ग निर्णय समितिको कुरा बेग्लै होला । तर, तिहार आउन अझै केही दिन बाँकी नै छ । मौसमले पनि छिटो गरेर होकी यसपटक तिहारका लागि भनेर किसानले लगाएका सयपत्री, मखमली लगायत फूल छिट्टै फुलेको किसानहरू बताउँछन् । किसानहरूले लगाएका फूल बगैंचामै झर्न थालेका छन् ।

त्यस्तै काठमाडौँमै पनि कतिपयले कौसीमा फूल लगाएका छन् । बगैंचामा रोपेका छन् । तर, फूल झरेर सौन्दर्य हराएको छ । सौदन्र्य त हरायो नै भाइटीकामा माला उन्न भनेर बचाएर राखेको फूल झर्दा दिदीवहिनीहरू चिन्तित देखिन्छन् ।वत्तीसपुतलीकी विन्दु खनाल घरको कौशीमा फूल स्याहार्दै गरेको अवस्थामा भेटिइन् । भाइटीकाका लागि भनेर गमलामा रोपेको सयपत्री फुलेर झर्न थालेपछि उनी चिन्तित देखिन्थिन् । ‘अरु वर्षमा जस्तै असारको अन्तिमतिर रोपेको थिएँ, भाइटीका आएकै छैन, फूल फुलेर झर्न थालिसक्यो उनले भनिन् भाइटीकामा किन्नै पर्ने भयो ।

यस वर्षको भाइटीका केही ढिला परेकाले अघिल्लो वर्षकै समयमा फूल रोप्नेहरु समस्यामा परेका हुन् । पात्रो हेरेर फूल नरोप्नेहरु समस्यामा परेका छन् । सामान्यतः असारको अन्तिमतिर फूल रोप्ने गरिन्छ । तर, यसपालिको भाइटीका अघिल्लो वर्षको भन्दा १९ दिन ढिला भएकाले सयपत्री फुलेर पनि झर्न थालेको छ ।

त्यसो त, शहरमा ठाउँ अभाव हुँदा र व्यस्त दैनिकीले आफैले दुःख गरेर फूल रोप्नुको सट्टा बजारे फूलले नै धेरै तिहारको गर्जो टार्ने गरेको छ ।

फ्लोचिकल्चर एशोसिएनसन अन्तर्गतको कट फ्लावर ग्रोवर उपसमितिकी सचिव एवं पुष्प व्यवसायी सुशीला कठायतका अनुसार पात्रो नहेरी व्यवसायिक फूल खेती नगर्ने कतिपय व्यवसायी फूल झर्न थालेपछि चिन्तित छन् । तिहारमा एक करोडको फूल कारोबार हुने गरेकोमा ३० देखि ३५ लाखको माला भारतबाट आउँछ । ९० प्रतिशत आन्तरिक उत्पादनले धाने पनि तिहारमा माग ह्वात्तै बढ्न भएकाले १० प्रतिशत भारतीय बजारबाट ल्याउनै पर्ने बाध्यता छ ।

व्यवसायीका अनुसार यसवर्ष मखमली र गोदावरीको फूलको माला आन्तरिक उत्पादनले धान्ने भएकाले नपुगेको सयपत्रीको माला भारतबाट आयात हुनेछ ।