ट्राफिक नियम उल्लङघनबारे जरिवाना ह्वात्तै बढाउने सरकारको तयारी

लाइसेन्सको अवधि बोब्बर हुने, पठाओ र टुटललाई नियमन गर्न सरकारले थाल्यो यस्तो तयारी

अर्थ र बाणिज्य

- न्युज-नेपाल

काठमाडाैं । सरकारले सवारी चालक अनुमति पत्र (ड्राइभिङ लाइसेन्स) को अवधि ५ बाट बढाएर १० वर्ष पुर्याउने तयारी थालेको छ । सवारी तथा यातायात व्यवस्था ऐन संशोधन गरेर लाइसेन्सको अवधि १० बर्ष बनाउन लागिएको हो ।

विकसित मुलुक लगायत विश्व बजारमा रहेको कानुन र नियमलाई आधार बनाएर लाइसेन्सको अवधि बढाउन यातायात व्यवस्थालाई सुधार गर्नुपर्ने देखिन्छ, यातायात व्यवस्था विभागका निर्देशक गोकर्ण उपाध्याय भन्छन् । यातायात क्षेत्रलाई सुधार गर्न नयाँ ऐन ल्याउन लागिएको छ। यसबारे विभागले सुझाव सहितको मस्यौदा बनाइरहेको छ।

जसमा लाइसेन्सको अवधि बढाएर १० बर्ष बनाउनुपर्ने सुझाव राखिएको छ। ‘लाइसेन्स भनेको घरी घरी नवीकरण गरिरहने चिज पनि होईन। जारी भएपछि कम्तीमा १० बर्ष त्यसले काम गर्नुपर्छ भन्ने हो,’ उनले भने ।

सवारीसाधनमा चलाउँदा नियम उल्लङघन गर्नेसँग लिने जरिवाना समेत बढाउन लागिएको छ। ट्राफिक नियम पालना सबैलाई गराउने उदेश्यले हालको जरिवानालाई बढाउन प्रस्ताब गरिएको उनले बताए।

एक/दुई हजार जरिवाना लिँदा कसैले नियम पालना नै नगर्ने भएका कारण पालना गराउनका लागि जरिवाना बढाउन लागिएको विभागले जनाएको छ ।

पठाओ र टुटलल जस्ता सेवाहरु नियम गर्नका लागि आवश्यक व्यवस्था नयाँ ऐनमा समेट्न लागिएको उपाध्यायले जानकारी दिए । सेवाहरु चाहिने भएका कारण अहिलेसम्म विभागले आफ्नो औपचारिक धारणा सार्वजनिक नगरेको हो ।

विभागले सुझाव सहितको मस्यौदा तयार पारेर यातायात मन्त्रालयमा पठाउने छ । करिव तीन महिनादेखि नयाँ ऐनका लागि विभागमा काम भइरहेको छ । प्रारम्भिक ड्राफ्ट तयार हुने अवस्थामा रहेको उपाध्यायले बताए ।

यातायात कार्यालयहरु प्रदेश मातहतमा पठाईसकेकाले नयाँ बन्ने ऐनलाई गाईडलाईन मानेर प्रदेश कार्यालयले ऐन बनाउने छन् । प्रदेशले यातायात ऐन बनाउँदा विभागको ऐनसँग नबाझ्ने गरि बनाउनुपर्ने छ ।