महराले गल्ती गरे, अदालतले उचित कारबाही गर्नेमा आशावादी छुः प्रचण्ड

प्रचण्डले भने, महराले नेतृत्वलाई ढाँटेर झन ठूलो गल्ती गरे

राजनीति

काठमाडाैं । नेपाल कम्युनिष्ट पार्टी (नेकपा)का अध्यक्ष प्रचण्डले पूर्वसभामुख कृष्णबहादुर महराले गल्ती गरेको धारणा सार्वजनिक गरेका छन् ।

लामो समय माैन रहेका पार्टी अध्यक्ष प्रचण्डले महराले नैतिक रुपमा गल्ती गरेको भन्दै नेतृत्वलाई नै ढाँटेर झन ठूलो गल्ती गरेको जनाएका हुन् ।

प्रेस संगठन दाङले गरेको कार्यक्रममा बोल्दै प्रचण्डले महराले गल्ती गरेका कारण कानुनी रुपमा उचित कारबाही हुनुपर्ने धारणा सार्वजनिक गरेका हुन् ।

प्रचण्डले महरासँग जानकारी लिदाँ आफूले त्यस्तो कुनै काम नगरेको भनेर ढाँटेर झन ठूलो गल्ती गरेको भन्दै उनले भने, ‘पहिले केही गरेको छैन भन्नुभयो । पछि सबै तथ्यहरुले उहाँले गल्ती गरेको पुष्टि भयो । आफैंले पनि स्विकार्नुभयो ।’

महराले गरेको गल्तीलाई अदालतले उचित रुपमा न्याय सम्पादन गर्ने भएकाले यसबारे राजनीतिक रुपमा टिकाटिप्पणी गर्नु आवश्यक नरहेको समेत जनाए ।

यस्तै महराले गम्भीर प्रकारको नैतिक गल्ती गरेको भन्दै प्रचण्डले अदालत उचित कारबाही गर्नेमा आशावादी रहेको समेत जनाए ।

जिम्मेवार पदमा पुगेको व्यक्तिले अनैतिक काम गर्नु र पार्टी नेतृत्वलाई ढाँट्नु झन् नराम्रो काम भएको उनले बताए । ‘पहिले अरु नेताहरुलाई बुझ्न पठाएँ, गलत जानकारी दिनुभयो । चित्त नबुझेर आफैं बुझ्न गएँ तर पनि सही कुरा भन्नुभएन,’ उनले भने, ‘आफ्नो नेतृत्वलाई त्यसरी ढाँट्नु उचित भएन । झन् गल्ती भयो ।’

महराले आफूले गरेको गल्ती स्विकार गर्दै कानूनी प्रक्रियामा राज्यलाई सहयोग गर्नुपर्ने बताउँदै दाहालले फेरी सच्चिएर जनताको सेवामा फर्कने आशा व्यक्त गरे ।