लिम्पियाधुरा समेटेर नक्सा जारी गर्न सरकारलाई सचिवालयको निर्देशन

राजनीति

- न्युज-नेपाल

काठमाडौं । सत्तारूढ नेपाल कम्युनिस्ट पार्टी (नेकपा)ले लिम्पियाधुरासहितका भू–भाग समेटेर नयाँ नक्सा जारी गर्न सरकारलाई निर्देशन दिएको छ ।

सरकारको नीति तथा कार्यक्रममाथि सुझाव दिन बसेको नेकपा सचिवालयको बैठकले नेपालको भूमिको रक्षा गर्न र तत्काल नक्सा जारी गरेर भारतलाई जवाफ दिन निर्देशन दिएको छ ।

“हामीले लिम्पियाधुरासहितका भू–भाग समेटेर नयाँ नक्सा जारी गर्न सरकारलाई निर्देशन, सुझाव दिएका छौं,” बैठकपछि सचिवालय सदस्य तथा वरिष्ठ नेता झलनाथ खनालले भने, “नेपालको भू–भागको रक्षा गर्नु सरकारको कर्तव्य हो । यसमा सरकार कहीँ कतैबाट विचलित हुनुहुँदैन ।”

भारतले गत नोभेम्बरमा आठौं राजनीतिक नक्सा प्रकाशित गर्दै नेपालका भूभाग पनि समेटेको थियो । त्यसमा नेपालले तुरुन्तै जवाफ फर्काउनुपर्ने आवाज उठेको छ । नेपालको भूमि अतिक्रमण गर्दै लिपुलेक जोड्ने सडक खनेको विषयमा पनि सरकारले दृढ भएर प्रस्तुत हुनुपर्ने राजनीतिक तवरमै वार्ता गर्न सुझाव दिइएको खनालले बताए ।

त्यस्तै आजको बैठकले कोरोनाको सङ्क्रमण भयावह बन्दै गएकाले सरकारले प्रभावकारी कदम चाल्नुपर्ने निष्कर्ष निकालिएको उनले बताए ।

बैठकमा आजै संसद्‍मा प्रस्तुत हुने नीति तथा कार्यक्रमबारे पनि छलफल भएको थियो । कोरोना कारण शिथिल बनेको अर्थतन्त्र उकास्‍ने गरी कार्यक्रम प्रस्तुत गर्न सुझाव दिएको खनालले बताए ।

“कोरोनाले असर पारेका क्षेत्रलाई उकास्‍नेतिर नीति, कार्यक्रम केन्द्रित हुनुपर्छ, परम्परामुखी भन्दा पनि विशेष आर्थिक कार्यक्रमको जरुरी परेको छ । हामीले त्यही सुझाव दियौं,” उनले भने ।

Comments

प्रकाशित मिति : 2020-05-15

लिम्पियाधुरा समेटेर नक्सा जारी गर्न सरकारलाई सचिवालयको निर्देशन

Comments

अरु समाचार