‘मैले लगाएको पुरानो थोत्रो जकेटले प्रचण्डलाई लज्जाबोध भएछ क्यारे!

राजनीति

- न्युज-नेपाल

काठमाडौं । पूर्व मन्त्री एवम्‌ तत्कालीन नेकपा माओवादी केन्द्रका नेता लोकेन्द्र विष्टमगरले आफूलाई खान-लाउन र चल्न नजान्ने भन्दै पार्टीका शीर्ष नेताहरूले हेपेको बताएका छन्‌।

विद्युतीय सामाजिक सञ्जाल फेसबुकमा उनले अध्यक्ष पुष्पकमल दाहाल ‘प्रचण्ड’ र वरिष्ठ नेता बाबुराम भट्टराईले आफूमाथि पोखरा विमानस्थलमा गरेको व्यवहारबारे उल्लेख गरेका हुन्‌। ‘मेरो आदर्श स्खलित भएको दिन!’ शीर्षक राखेर उनले लेखको स्टाटसमा एकदिन पोखरा एअरपोर्टमा क.प्रचण्ड र क. बाबुरामसँग भीआइपी कक्षमा रहेका बेलाको प्रसंग उप्काएका छन्‌।

उनले लेखेका छन्‌, ‘मैले लगाएको पुरानो थोत्रो जकेटले उहाँहरुलाई लज्जाबोध भएछ क्यारे! मुन्टो निहुराएर कुरा गर्नुभो! मैले सुनिरहे! म अलि पर थिएँ। सारमा लगाउन,खान र चल्न नजान्ने भनेर मेरो चर्को आलोचना भयो। मैले नसुने झैं गरेर सुनिरहे कान थापेर। मलाई नमीठो लाग्यो!’ सो घटना पार्टी भर्खरै शान्तिप्रकृयामा आएको बेलाको भएको उल्लेख गर्दै मगरले आफूसँग त्यतिखेर पैसा पनि नभएको उल्लेख गरेका छन्‌।

‘आर्थिक मितव्ययिता, सादा जीवन उच्च विचार, कडा परिश्रम हाम्रा आदर्श थिए। पार्टीको आदर्श र नीति भन्दा बाहिर जानु मर्नु जस्तो लाग्थ्यो’ उनले लेखेका छन्‌, ‘आफ्नो आदर्श नेतृत्वले आदर्शकै खिलाफ खिसिटिउरी गरेको सुनेर-भोगेर भनननन…चक्कर आयो, तर,सम्हालिएर बसेँ र अडिएँ। यस्ता चक्कर र घनचक्करहरु दर्जनौं भोगियो! अनि लाग्यो : मेरो पार्टी र आदर्श त उहिल्यै सक्किएछ! म उल्लु रहेछु, धत् मोरा! भनेर आफैँलाई बेस्सरी सरापेर स्वेच्छिक अवकास लिइयो।

‘१० वर्षे जनयुद्धको पूरै समय भूमीगत रहेका र जेलनेल समेत भोगेका मगरले पार्टीप्रति असन्तुष्टि जनाउँदै २०७४ असोजमा पार्टी परित्याग गरेका थिए। २०३७ सालदेखि कम्युनि्ट राजनीतिमा लागेका विष्ट एकपटक पर्यटन तथा नागरिक उड्ययनमन्त्री र एकपटक स्वास्थ्यमन्त्री बनिसकेका छन्‌। पार्टी छाडेपछि विष्टले काभ्रेको भकुन्डेवेसी र काठमाडौंको साँखुमा जमिन भाडामा लिएर कालोमार्सी धान खेती गरेका थिए। हाल उनी दाङको तुलसीपुर उपमहानगरपालिका–१८ स्थित बिजौरीमा ड्रागन फ्रुटको खेतीमा लागेका छन्‌।