बिनाविकल्प निकुञ्‍ज वरपरका घरबास नउठाउन सरकारलाई संसदीय समितिको निर्देशन

राजनीति

- न्युज-नेपाल

काठमाडौँ । प्रतिनिधिसभाको कानुन, न्याय तथा मानवअधिकार समितिले विपदको समयमा वैकल्पिक व्यवस्थाबिना राष्ट्रिय निकुञ्‍ज वरपरका घरबास नउठाउन सरकारलाई निर्देशन दिएको छ ।

समितिको आइतबार बसेको बैठकले संविधानले प्रदान गरेको सम्मानपूर्वक बाँच्न पाउने अधिकार र बासस्थानको हकविपरीत जनतालाई विपदको समयमा वैकल्पिक व्यवस्थाबिना चितवन राष्ट्रिय निकुञ्ज र बर्दिया राष्ट्रिय निकुञ्जमा घरबास उठाउने कार्य नगर्न/नगर्न नगराउन वन तथा वातावरण मन्त्रालयलाई निर्देशन दिने निर्णय गरेको हो । समिति सभापति कृष्णभक्त पोखरेलका अनुसार हात्ती लगाएर घर भत्काउने, घरमा आगजनी गर्ने गैरकानुनी कार्य भएको समितिको ठहर गरेको छ ।

त्यस्तै चितवन माडी नगरपालिका ९ मा हात्ती लगाएर चेपाङ समुदायका परिवारको घर भत्काउने र आगजनी कार्यमा प्रत्यक्ष संलग्नलाई कानुनी कारबाहीको दायरामा ल्याउन र कानुनी कारबाही भएको विषय समितिमा जानकारी गराउन वन तथा वातावरण मन्त्रालयमा निर्देशन गर्ने निर्णय पनि बैठकले गरेको सभापति पोखरेलले जानकारी दिए ।

बैठकले चितवनका २४ वर्षीय राजकुमार चेपाङलाई निकुञ्जभित्र सेनाले पक्राउ गरी कुटपिटका कारण मृत्यु भएको सम्बन्धमा सत्य तथ्य छानबिन गर्न र दोषीमाथि कारबाही गर्न सरकारको ध्यानाकर्षण गराउने निर्णय गरेको छ । सभापति पोखरेलले मृतकका परिवारलाई उचित क्षतिपूर्ति उपलब्ध गराउन पनि वन तथा वातावारण मन्त्रालयमार्फत सरकारको ध्यानाकर्षण गराउने निर्णय गरिएको बताए