ओली–प्रचण्डबीच पुनः ‘ठाकठुक’

राजनीति

- न्युज-नेपाल ओलीले एकलौटी नियुक्ति गरेपछी प्रचण्डले प्रश्न उठाएको

काठमाडौं । प्रधानमन्त्री केपी शर्मा ओली र पार्टी अध्यक्ष पुष्पकमल दाहाल ‘प्रचण्ड’बीच पुनः ठाकठुक परेको छ ।

कार्यदलले पार्टीभित्र उत्पन्न गतिरोध चिर्न निकास खोजिरहेका बेला प्रधानमन्त्री ओलीले एकलौटी नियुक्ति गरेको भन्दै प्रचण्डले प्रश्न उठाएको नेकपाका एक नेताले जानकारी दिए ।

महासचिव विष्णु पौडेल संयोजक रहेको ६ सदस्यीय कार्यदल लगातार बैठक बसेर काम गरिरहेको छ । कार्यदल काम सकेपछि मात्रै दुई अध्यक्ष बसेर प्रस्ताव तयार पार्ने समझदारी भएको थियो । र, प्रधानमन्त्रीले पार्टीलाई नसोधी कुनै पनि निर्णय नलिने समझदारी समेत भएको थियो ।

त्यसविपरीत ओली एकलौटी अघि बढेको र पार्टीलाई नसोधी नियुक्ति, सिफारिस प्रक्रिया अघि बढाएको भन्दै प्रचण्ड क्षुब्ध बनेको एक नेताको दाबी छ ।

मंगलबार बिहान ११ बजे प्रधानमन्त्री ओली र पार्टी अध्यक्ष प्रचण्डको भेटवार्ता भएको थियो । “भेटमा अध्यक्ष प्रचण्डले हामी पार्टीभित्रको विवाद अन्त्यको उपाय खोजिरहेका छौं । कार्यदलले काम गरिरहेको छ । तर, तपार्ईं मन्त्रिपरिषद् बैठक राखेर धमाधम नियुक्ति गरिरहनुभएको छ । यसले राम्रो सन्देश जाँदैन । सहमतिको वातावरण पनि बन्दैन । जे निर्णय गर्ने हो, पार्टी कमिटीमा छलफल गरेर गरौं । अन्यथा सहमति खोज्ने कुराको कुनै अर्थ छैन भनेर भन्नुभएको छ । कार्यदलले सहमतिको खाका बनाइरहेका बेला यस्तो महत्त्वपूर्ण नियुक्ति गर्नु विधि, पद्धति विपरीत कुरा हो,” पूर्वमाओवादी केन्द्र समूहका एक नेता भन्छन् ।

भदौ १ गतेको मन्त्रिपरिषद् बैठकले केही दिनअघि मात्रै प्रेस काउन्सिल नेपालमा सदस्य नियुक्त भएकी दुर्गा भण्डारी (पौडेल)लाई कार्यवाहक अध्यक्ष दिने निर्णय गरेको थियो ।

किशोर श्रेष्ठलाई पदमुक्त गर्दै भण्डारीलाई कार्यवाहक दिइएकोमा पार्टीभित्र असन्तुष्टि बढेको छ नै । सर्वोच्च अदालतमा मुद्दा पनि परेको छ । भदौ १ गतेकै मन्त्रिपरिषद् बैठकले युवा तथा साना व्यवसायी स्वरोजगार कोषको उपाध्यक्षमा देवराज रोकालाई नियुक्त गर्ने निर्णय गरेको छ ।

त्यही दिनको मन्त्रिपरिषद्को बैठकले परराष्ट्र सेवामा रहेका सहसचिव गेहेन्द्र राजभण्डारी बेल्जियम र युरोपियन युनियनको राजदूत सिफारिस गरको छ । परराष्ट्र सेवामै रहेका तपस अधिकारीलाई पाकिस्तान र रामकाजी खड्कालाई जर्मनीको राजदूतमा सिफारिस गरेको सार्वजनिक गरिएको छ ।

त्यसका अतिरिक्त थुप्रै नियुक्तिका निर्णय गरेर बाहिर नल्याइएको पूर्वमाओवादी केन्द्रका नेताहरू बताउँछन् ।