शेखर गोल्छाले गरे महासंघ अध्यक्षमा पदबहाली

अर्थ र बाणिज्य

- न्युज-नेपाल

काठमाडौं। नेपाल उद्योग वाणिज्य महासंघ (एफएनसीसीआई)का अध्यक्ष शेखर गोल्छाले आज पदाबहाली गरेका छन्।

५४औं साधारण सभाबाट १९औं अध्यक्ष बनेका गोल्छाले हिजो आइतबार अध्यक्षको सपथ ग्रहण गरेका थिए।

पदबहालीपछि उनले आफ्नो कार्यकालमा सफलता प्राप्त गर्न सचिवालयका कर्मचारीहरूको पनि महत्त्वपूर्ण भूमिका रहेको बताएका थिए। उनले पदाधिकारी र कार्यकारिणी समिति सदस्यहरू निश्चित अवधिका लागि आउने भए पनि कर्मचारीहरू महासंघको स्थायी संरचना भएकाले सचिवालयले दिने सेवालाई चुस्त दुरुस्त र प्रभावकारी बनाउन निर्देशन दिए।

उनले पदबहालीपछि बोल्ने क्रममा राष्ट्रिय अर्थतन्त्रको सुदृढीकरणमा निजी क्षेत्रको भूमिकालाई प्रभावकारी बनाउँदै जाने आफ्नो मुख्य लक्ष्य र उद्देश्य रहेको समेत बताएका छन्।

सचिवालयलाई पूर्ण रूपमा सुदृढीकरण गर्ने प्राथमिकता रहेकाले सोहीअनुसार वातावरण निर्माण गर्ने, कर्मचारीहरूको वृत्ति विकास र सचिवालयको प्रभावकारी सञ्चालनका विषयमा ध्यान दिई महासंघ सचिवालयलाई एक प्रोफेशनल अर्गनाइजेशका रूपमा सञ्चालन गर्ने पनि गोल्छाले स्पष्ट पारे।