नेकपाका गुटगत भेला तीव्र, विराटनगरमा ओली गुटका विद्यार्थीलाई प्रशिक्षण

राजनीति

- न्युज-नेपाल

काठमाडौँ। पार्टी विवाद चरमोत्कर्षमा पुगेका बेला सत्तारूढ दल नेकपाभित्र गुटगत भेला र प्रशिक्षणले पनि तीव्रता पाएका छन् ।

प्रधानमन्त्री एवं प्रथम अध्यक्ष केपी शर्मा ओली पार्टीभित्र अल्पमतमा परेपछि उनीनिकट विद्यार्थी नेताहरूले छुट्टै भेला र प्रशिक्षण थालेपछि दाहाल-नेपाल समूहले पनि भेला तीव्र पारेको छ ।

१० मंसिरमा अनामनगरस्थित मदन भण्डारी कलेजमा केपी ओली गुटका विद्यार्थी नेताले छुट्टै भेला आयोजना गरेपछि १९ मंसिरमा प्रचण्ड र वरिष्ठ नेता माधव नेपाल समूहका विद्यार्थीले थापाथली क्याम्पसमा अर्को भेला गरे । शनिबार पनि गोकेर्णेश्वरमा प्रचण्ड-नेपाल समूहकै विद्यार्थी नेताले भेला आयोजना गरे ।

भेलामा आफ्नो समूहको योजना अनुसार अघि बढ्न विद्यार्थीहरूलाई निर्देशन दिइएको एक विद्यार्थी नेताहरूले जनाए ।

अखिलका संयोजक ऐन महर नै लागि परेर दाहाल-नेपाल समूहका नेताहरूविरूद्ध लागेपछि प्रतिवादस्वरूप अर्को समूहका मात्रै विद्यार्थीहरू भेला हुन बाध्य भएको अखिल क्रान्तिकारीका पूर्व उपाध्यक्ष सुरेन्द्र बस्नेतले बताए ।

ओलीनिकट अखिलकै अर्का विद्यार्थी नेता रश्मी आचार्य भने पार्टी एकताको भावना र मर्मविपरित शीर्ष नेतृत्वबाट प्रधानमन्त्रीविरूद्ध जनस्तरमा गलत सन्देश प्रवाह गरिन थालिएपछि त्यसको प्रतिवादमा भेला गरिएको बताउँछन् ।

यसैबीच ओली निकट विद्यार्थीहरुको प्रदेश भेला विराटनगरमा आयोजना गरिएको छ । भेलालाई सम्बोधन गर्न अनेरास्वीयूका केन्द्रीय संयोजक ऐन महरसहित ओली पक्षाका केन्द्रीय विद्यार्थी नेताहरु विराटनगर पुगेका छन् ।

प्रदेश स्तरीय भेलामा प्रदेशका १४ वटै जिल्लाबाट ओली निकट विद्यार्थी नेता सहभागी छन् । मोरङका क्याम्पस इकाई कमिटी अध्यक्ष र जिल्ला सदस्यलाई पनि भेलामा बोलाइएको छ ।

विराटनगरको निहारिका कलेजमा आयोजना गरिएको भेलामा १२५ जना भन्दा बढीको सहभागीता रहेको जनाइएको छ ।