सरकारमा जाने विषयमा छलफल गर्न जसपाको सचिवालय बैठक जारी

राजनीति

- न्युज-नेपाल

काठमाडाैँ । सरकारमा जाने विषयमा छलफल गर्न जनता समाजवादी पार्टी (जसपा)को सचिवालय बैठक बसेको छ ।

पार्टी कार्यालय बालकुमारीमा बसिरहेको बैठकले सरकारमा जाने विषयमा छलफल गर्ने छ । जसपाभित्रै यसअघि बुधबार बसेको जसपाको पदाधिकारी बैठक कुनै निर्णय गर्न सकेको थिएन ।

सर्वोच्चले संसद पुनर्स्थापना गरेपछि नयाँ सरकार निर्माणको तयारीमा रहेको माओवादी केन्द्रले जसपालाई सत्ता सहकार्यको प्रस्ताव राखिरहेको छ । नेकपा एमालेले पनि आफ्नो सरकार जोगाउन जसपालाई सत्तामा आउन प्रस्ताव अघि सारेको छ ।

जसपाले भने मधेस र थारुहट आन्दोलनको बेलामा पक्राउ परेका रेशम चौधरीलगायत नेता, कार्यकर्ताको रिहाई, मुद्दा फिर्ता र संविधान संशोधनसहितका माग पूरा भएपछि मात्रै सरकारमा जाने बताउँदै आएको छ । आजको सचिवालय बैठकले यस विषयमा निर्णय गर्ने सन्भावना छ ।

बैठकमा संघीय परिषद् अध्यक्ष डा. बाबुराम भट्टराई, अध्यक्षद्वय महन्थ ठाकुर र उपेन्द्र यादव तथा वरिष्ठ नेताहरू अशोक राई र राजेन्द्र महतो सहभागी छन ।