निश्‍चित व्यक्ति प्रधानमन्त्री बन्‍न नपाए त्यसैलाई प्रतिगमन भन्‍न थालिएको छ : मन्त्री ज्ञवाली

काठमाडाैँ । परराष्ट्र मन्त्री प्रदीप ज्ञवालीले निश्चित व्यक्तिको प्रधानमन्त्री बन्ने सपना पूरा भएन भने त्यसैलाई प्रतिगमन भनेर व्याख्या गर्ने गरिएको बताएका छन्।

आज प्रतिनिधि सभा बैठकमा दलका तर्फबाट बोलेका ज्ञवालीले भने, ‘निश्चित व्यक्तिको प्रधानमन्त्री बन्ने सपना पूरा भएन भने त्यसैलाई प्रतिगमन भनेर व्याख्या गर्ने त्यो खालको नयाँ भास्य पनि हामीकहाँ छ। तर जनताका लागि देशले हासिल गरेका सफलता अग्रगमन हुन् भन्ने लाग्छ।’

उनले निश्चित व्यक्ति पदमा पुग्न पाउँदा अग्रगमन र पदमा पुग्न नपाउँदा प्रतिगमन हुने? भन्ने प्रश्न पनि गरेका छन्।

‘एउटा शब्द चर्चामा आयो, निश्चित व्यक्ति पदमा पुग्न पाउँदा अग्रगमन हुने तर पदमा पुग्न नपाउँदा प्रतिगमन हुने? हाम्रा निम्ति काठमाडौंका जनताले पानी खान पाउनुजस्तो अग्रगमन केही हुन सक्दैन।’

पुस ५ मा प्रधानमन्त्री केपी शर्मा ओलीले प्रतिनिधि सभा विघटन गरेपछि दलहरूले प्रतिगमन गरेको भन्दै विरोध गरेका थिए। सर्वोच्चले प्रधानमन्त्री ओलीको कदम बदर गरिदिएपछि प्रतिनिधि सभा पुनर्स्थापना भएको थियो।

पुनर्स्थापित प्रतिनिधि सभाको चौथो बैठकमा आज बोलेका मन्त्री ज्ञवालीले सरकारले यसबीचमा दुइटै मुद्दा हारे पनि अदालतको आलोचना नगरेको बताए।

‘सरकारको हिसावले भन्ने हो भने, प्रधानमन्त्रीको हिसावले भन्ने हो भने हामी दुइटै मुद्दा हारेका छौं। मुद्दा हारे पनि हामीले अदालतलाई कुनै आलोचना वा आछेप लगाएका छौं न कुनै ढंगले अगाडि बढेका छौं,’ उनले भने।

अदालतले प्रतिनिधि सभा विघटन बदर गरिदिएको थियो। एमाले तथा माओवादी एकीकरण गरी बनाएको नेपाल कम्युनिष्ट पार्टी ऋषि कट्टेलको भएको पनि सर्वोच्चले फैसला गरिदिएको थियो। यसतर्फ संकेत गर्दै ज्ञवालीले दुवै मुद्दा हारेको उल्लेख गरेका हुन्।

उनले सरकारका तर्फबाट ल्याइएका विधेयकहरू संसदमा टेबुल गर्न नपाएको पनि बताए। संसदको पहिलो बैठकमा अध्यादेश पेश गर्न नदिइएको उनको भनाइ थियो।

Comments