दार्चुला घटनामा सांसदलाई गृहमन्त्रीको जवाफ- छानविन हुँदासम्म त पर्खिनुस्

राजनीति

- न्युज नेपाल

काठमाडौं । गृहमन्त्री बालकृष्ण खाणले दार्चुला घटनामा छानविन समितिको प्रतिवेदन पर्खन सांसदहरूलाई आग्रह गरेका छन् ।

राष्ट्रियसभामा सांसदहरूको प्रश्नको जवाफ दिँदै दार्चुला घटनाबारे छानविन गर्न समिति सक्रिय भइसकेको र १० दिनभित्र प्रतिवेदन आउने भएकाले केही समय धैर्य रहन उनले आग्रह गरेका छन् ।

सो घटनाबारे नागरिक स्तरबाट उठेका, सञ्चारमाध्यममा आएका र जनप्रतिनिधिबाट व्यक्त भएका धारणालाई सरकारले गम्भीररूपमा लिएको भन्दै गृहमन्त्री खाणले छानविन प्रतिवेदन जस्तो आउँछ सोही अनुसार सरकारले कदम चाल्ने बताए ।

‘यो घटना संवेदनशील छ र यसमा छानविन समितिले काम गरिरहेको छ । छानविन प्रभावित हुनेगरी हामीले राय दिन मिलेन । छानविनबाट आएको निष्कर्षमा हामी जुनसुकै अडान लिन तयार छौ’, खाणले भने ।

यसअघि गृहमन्त्री खाणलाई एमाले सांसदहरुले भारतीय एसएसबीको ज्यादतीबारे बोल्न नसकेको र भारतसँग हिम्मत गरेर कुरा गर्न नसकेको आरोप लगाउँदै प्रश्न सोधेका थिए ।