यस्तो छ नेकपा (एकीकृत समाजवादी) को घोषणापत्र

राजनीति

- न्युज नेपाल

काठमाडौं । प्रस्तावित नेकपा (एकीकृत समाजवादी)ले आफ्नो लक्ष्य लोकतान्त्रिक मूल्य मान्यतासहितको समाजवाद भएको बताएको छ । पार्टीको घोषणा पत्रमा मार्गदर्शक सिद्धान्त मार्कसवाद–लेनिनवाद भएको उल्लेख छ ।

“यस पार्टीको मार्गदर्शक सिद्धान्त मार्कसवाद–लेनिनवाद हो । मार्कसवाद–लेनिनवाद क्रान्तिकारी चरित्रको वैज्ञानिक विश्वदृष्टिकोण र श्रमजीवी वर्गको मुक्ति एवम् समाज परिवर्तनको मार्गदर्शक सिद्धान्त हो । यसमा रहेका द्वन्द्वात्मक भौतिकवादी विश्वदृष्टिकोण, परिवर्तनकारी दृष्टिकोण, श्रमजिवी वर्गको पक्षपोषण गर्ने दृष्टिकोण, जन–सार्वभौमसत्ताको दृष्टिकोण र सिद्धान्त र व्यवहारबिच एकरूपताको दृष्टिकोणजस्ता मूलभूत सैद्धान्तिक प्रस्थापनाहरू आज पनि उत्तिकै सान्दर्भिक छन् । तर, मार्क्सवाद कुनै जडसूत्र नभएर एक गतिशील वैज्ञानिक सिद्धान्त हो । त्यसैले यसको प्रयोग सिर्जनात्मक रूपले हुन्छ र हुनुपर्दछ । नेपालमा मार्क्सवाद प्रयोगको प्रयासका प्रारम्भकर्ता कमरेड पुष्पलालले नै मार्क्सवादको सिर्जनात्मक प्रयोग गर्ने विचार प्रस्तुत गर्नुभएको थियो र जननेता कमरेड मदन भण्डारीले जनताको बहुदलीय जनवादमा त्यसको सविस्तार व्याख्या गर्नुभएको थियो,” घोषणा पत्रमा भनिएको छ, “यो पार्टी अग्रजहरूले प्रस्तुत गर्नुभएको मार्क्सवादको सिर्जनात्मक प्रयोग गर्ने विचारमा दृढ छ । वर्तमान राष्ट्रिय तथा अन्तर्राट्रिय परिस्थितिले पनि त्यही निर्देश गरेको छ ।”

पार्टीको विधान, नियमावली, घोषणापत्रका विषयमा छलफलका लागि प्रस्तावित पार्टीको केन्द्रीय कमिटी बैठक जारी छ । चन्द्रागिरिमा बसिरहेको बैठकमा हिजो वितरण गरिएको दस्ताबेजमा छलफल हुने केन्द्रीय सदस्य जीवनराम श्रेष्ठले जानकारी दिए । पार्टी दर्ताको लागि निर्वाचन आयोगले केन्द्रीय सदस्य तथा सांसद्हरुलाई बुधबार बोलाएको छ । त्यसअघि केन्द्रीय कमिटी बैठक बसेको हो ।