रामकुमारी, सोमप्रसाद र मेटमणिका जिल्लाका जनप्रतिनिधिले नेकपा एस रोजेनन्

काठमाडाैँ । नेकपा एमालेबाट टुक्रिएर बनेको नेकपा एकिकृत समाजवादीलाई लुम्बिनी प्रदेशका जनप्रतिनिधिलाई साथ दिएनन् ।

नेकपा एसका प्रभावशाली नेताहरु सोमप्रसाद पाण्डे, रामकुमारी झाँक्री र मेटमणि चौधरीका जिल्लामासमेत नेकपा एमाले छाड्ने जनप्रतिनिधिको संख्या नगण्य छ ।

गुल्मीकी झाँक्री, पाल्पाका पाण्डे, दाङका चौधरी र पछिल्लो समय पार्टी छाडेका बामदेव गौतमको बर्दियामा एमालेले धेरै जनप्रतिनिधि जोगाउन सफल भएको छ ।

३७ सदस्य प्रदेश सदस्य रहेको लुम्बिनीमा १ सांसद मात्र समाजवादीमा गएका छन् भने सबै १२ जिल्लाबाट दुई उपमेयर, २ उपाध्यक्ष, ६ वडाध्यक्ष र बाँकी वडासदस्य गरी ७१ जनामात्र समाजवादीमा लागेका हुन् ।

पार्टी बिभाजनका लागि सुरुदेखि नै लागिपरेकी नेतृ रामकुमारी झाँक्री र मेटमणि चौधरीकै जिल्लामा स्थानीय तहका जनप्रतिनिधिले उनीहरुलाई पत्याएनन् ।

स्थानीय तहका ७ प्रमुख र १० उपप्रमुखसहित ३३० जना जनप्रतिनिधि रहेको गुल्मीका कुनै पनि जनप्रतिनिधिले एकीकृत समाजवादी रोजेनन् । यसमा झाँक्रीलाई नराम्रो झड्का लागेको छ । प्रभावशाली नेता प्रदीप ज्ञवाली र गोकर्ण विष्ट एमालेमै बलियो भएपछि गुल्मीबाट सबै जनप्रतिनिधिले जोखिम मोल्न चाहेनन् ।

१ सय ९७ जना सूर्यचिह्न वाहक जनप्रतिनिधि रहेको मेटमणि चौधरीको जिल्ला दाङमा भने २१ जना वडा सदस्यहरुले एकीकृत समाजवादीका पक्षमा सनाखत गरेका छन् ।

लुम्बिनी प्रदेशमा सबैभन्दा बढी एकिकृत समाजवादी पार्टीका पक्षमा सनाखत दाङमा नै गरेको देखिन्छ ।

लुम्बिनी प्रदेशको बांकेमा ११ जनाले समाजवादी रोज्दा पाल्पा, कपिलवस्तु र पश्चिम नवलपरासीमा १/१ जनाले मात्रै नेकपा एकिकृत समाजवादीका पक्षमा सनाखत गरेका छन् भने रुपन्देहीमा ७ बर्दिया र अर्घाखाँचीमा ६/६ तथा रुकुम र रोल्पामा ५/५ जनाले मात्रै एकिकृत समाजवादी रोजेका छन् ।

यस्तै एमाले उपाध्यक्षबाट राजीनामा दिएका नेता बामदेव गौतमको गृहजिल्ला प्युठानमा ७ जनाले मात्रै एकीकृत समाजवादीका पक्षमा सनाखत गरेका छन् ।प्युठानका स्थानीय तहमा १९७ जना जनप्रतिनिधि नेकपा एमालेबाट निर्वाचित भएका थिए ।

गत भदौ १ गते एमाले बिभाजन भएपछि स्थानीय तहका जनप्रतिनिधिलाई एकीकृत समाजवादी पार्टी रोज्न निर्वाचन कार्यालयले भदौ २२ गतेसम्मको समय दिएको थियो ।

लुम्बिनीका कपिलवस्तु, पाल्पा र पश्चिम नवलपरासीबाट भने एक/एक जना जनप्रतिनिधिले एकीकृत समाजवादी पार्टीमा सनाखत गरेका छन् ।
पाल्पाबाट रम्भा गाउँपालिकाका १ जना जनप्रतिनिधिले मात्रै नेकपा एमालेबाट नेकपा एकीकृत समाजवादीमा सनाखत गरेकोे जिल्ला निर्वाचन कार्यालय पाल्पाले जनाएको छ ।

जिल्ला निर्वाचन कार्यालयका अनुसार रम्भा गाउँपालिका वडा नम्बर ५ का सदस्य ईश्वरी श्रेष्ठले नेकपा एमाले छोडेर नेकपा एकीकृत समाजवादी रोजेका हुन् ।

श्रेष्ठले समाजवादी रोजेपछि माधव नेपालका सम्धी सोमप्रसाद पाण्डेको गृह जिल्लामा नेकपा एकिकृत समाजवादी शून्यबाट जोगिएको हो ।
कपिलवस्तुमा शिवराज नगरपालिका वडा नम्बर ८ देविपुरकी कार्यपालिका सदस्य निर्मला सुनारले एकीकृत समाजवादिमा सनाखत गरेकी छन् । जिल्ला निर्वाचन कार्यालयका प्रमुख ज्ञानीराम पुरीले कपिलवस्तुमा एकीकृत समाजवादी र लोकतान्त्रिक समाजवादीमा एक÷एक जनाले सनाखत गरेको जानकारी दिए ।

सुनारले एमाले छोडेर एकीकृत समाजवादु रोज्दा शिवराज नगरपालिका १० कि वडाअध्यक्ष मन्जु मिश्राले जनता समाजवादी छोडेर लोकतान्त्रिक समाजवादी रोजेकी हुन् ।

त्यसैगरी पश्चिम नवलपरासीमा बर्दघाट नगरपालिका वडा न ९ का अध्यक्ष चन्द्रकान्त चापागाईंले नेकपा एमाले त्यागेर नेकपा एकीकृत समाजवादी रोजेका हुन् । चापागाईंसगै बर्दघाट वडा नं. २ का सदस्य कृष्ण प्रसाद पाण्डेले पनि एकीकृत समाजवादीमा सनाखत गरेकोमा पछि फिर्ता लिएका हुन् ।

जिल्ला निर्वाचन अधिकारी सुजाता खत्रीले सनाखत फिर्ता स्वीकृत गर्न नमिल्ने भएकाले उक्त पत्र आयोगमा पठाउने बताइन् ।

त्यसैगरी उपेन्द्र यादव नेतृत्वको जनता समाजवादी पार्टी त्यागेर महन्थ ठाकुर नेतृत्वको लोकतान्त्रिक समाजवादी पार्टीमा जाने जनप्रतिनिधि भने शून्य भएको छ।

उता अर्घाखाँची जिल्लामा भने ६ जना स्थानीय जनप्रतिनिधिले एकीकृत समाजवादी पार्टी रोजेका छन् ।

जिल्लामा पाणिनी गाउँपालिका उपाध्यक्ष लक्ष्मी गौतमसहित ६ जनाले नेकपा एकीकृत समाजवादी पार्टीमा सनाखत गरेका हुन् ।

गौतम सहित शितगंगा नगरपालिका वडा नम्बर ६ का सदस्य गोबिन्द प्रसाद पोख्रेल, शितगंगा नगरपालिका १३ का वडा सदस्य जिवलाल क्षेत्री, पाणिनी गाउँपालिका वडा नम्बर ३ का सदस्य ओमप्रकाश भुसाल, सन्धिखर्क नगरपालिका वडा नम्बर १ की महिला सदस्य शुमित्रा मुखिया र मालारानी गाउँपालिका ५ का सदस्य डाल बहादुर चौहानले नेकपा एकीकृत समाजवादी पार्टी रोजेको जिल्ला निर्वाचन कार्यालयले जनाएको छ ।

लुम्बिनीमा एकीकृत समाजवादी रोज्ने कुल ७१ जना जनप्रतिनिधिमध्ये सबैभन्दा धेरै दाङबाट २१ जनाले एमाले छोडेका छन् ।

त्यसैगरी बाँकेमा ११, रुपन्देही र प्युठान समान ७/७, बर्दिया ६, रुकुम पूर्व र रोल्पाबाट ५/५ जनाले नेकपा एकिकृत समाजवादी पार्टी रोजेको पार्टीका लुम्बिनी प्रदेश इन्चार्ज भागवत विश्वासीले बताए।

Comments