होटेल पार्क सफारीमा ओलीको ‘कोर टिम’, बन्दसत्रमा घोषणा गर्नेको सूची बनाइँदै

राजनीति

- न्युज नेपाल

चितवन । नेकपा (एमाले) को जारी महाधिवेशन टुंगोमा पुग्न नसकेका बेला अध्यक्ष केपी शर्मा ओलीसहितका मुख्य नेताहरु भने बन्दसत्र स्थलमा छैनन् ।

अध्यक्ष ओली र उनीनिकट ‘कोर टिम’ बन्दसत्र स्थल होटेल पार्क सफारीमा परामर्शमा छ । ओलीसहित नेताहरु विष्णु पौडेल, शंकर पोखरेल, प्रदीप ज्ञवाली, विष्णु रिमाल, महेश बस्नेत लगायतका नेताहरु भने होटेलमा आन्तरिक छलफलमा छन् ।

स्रोतका अनुसार लामो समयदेखि होटेलमै बसिरहेका उनीहरुले बन्द सत्रमा घोषणा गरिने पदाधिकारी र केन्द्रीय सदस्यहरुको सूची तयार पारिरहेका छन् ।

सहमतिका लागि भन्दै बिहान ८ बजेदेखि हुने भनिएको निर्वाचन प्रक्रिया अझैं शुरु गरिएको छैन् ।

हिजोको बन्द सत्रले ओलीलाई पदाधिकारी र केन्द्रीय सदस्यहरुको नाम प्रस्ताव गर्ने प्राधिकार दिएको थियो । त्यसै अनुसार एकलौटीरुपमा नाम घोषणा गर्ने र ध्वनी मतका आधारमा पारित गराउने तयारी भइरहेको छ।

वरिष्ठ नेता र महासचिवमा सहमति हुन नसकेकाले बिहानैदेखि विभन्न नेताहरुसँग ओलीले संवाद गरेका थिए।