निर्वाचन आयोगको अडानका कारण संसद अन्त्य गर्ने तयारीमा सरकार

गतिविधि

- न्युज नेपाल

काठमाडाैं । सरकारले प्रतिनिधिसभाको कार्यकाल शनिबार मध्यरातिदेखि अन्त्य गर्ने तयारी थालेको छ ।

निर्वाचन आयोगले प्रतिनिधिसभा समानुपातिक तर्फका उम्मेदवारको मनोनयन दर्तासंगै समयावधी सकिने भन्दै अडान कायम राखेपछि अन्ततः सरकार पनि प्रतिनिधिसभा अन्त्यको तयारीमा जुटेको हो ।

संसदको कार्यकालबारे विभिन्न अड्कलबाजी भइरहेका बेला मन्त्रीपरिषद्को शुक्रबार बस्ने बैठकले संघीय संसदको ११ औं अधिवेशन शनिबार मध्यरातिदेखि अन्त्य गर्न सिफारिस गर्ने तयारीमा जुटेको एक मन्त्रीले जनाए ।

‘सरकारले संसद्को कार्यकाल लम्ब्याउन लागेको गलत सन्देश गएकाले समानुपातिकको बन्दसूची बुझाउने अघिल्लो दिनबाटै राष्ट्रपतिसमक्ष संसद् अधिवेशन अन्त्यको सिफारिस गर्न लागिएको हो,’ ती मन्त्रीले भने ।

आगामी मंसिर ४ गतेका लागि तय भएको निर्वाचनका लागि प्रदेश र प्रतिनिधिसभातर्फ समानुपातिकको मनोनयन दर्ता आइतबारदेखि हुँदैछ । आयोगले आइतबार र सोमबार बन्दसूची बुझाउने कार्यक्रम तय गरेको छ । भने, आयोगले बन्दसूची बुझाउने अघिल्लो दिनदेखि नै संसदको कार्यकाल सकिने जनाइसकेको छ ।

यता, सरकार भने राष्ट्रपति विद्यादेवी भण्डारीले नागरिकता विधेयक पारित नगरेसम्म संसदको कार्यकाल राख्ने पक्षमा थियो । तर, आयोगले निर्वाचन कार्यक्रम सार्ने विषयमा अडान कायम राखेपछि सरकारले संसदको अधिवेशन हन्त्य गर्न सिफारिस गर्ने तयारी गरेको हो ।

‘सरकारले प्रस्ताव नगरेसम्म बैठक अन्त्य गर्ने अधिकार संसद् सचिवालयलाई हुँदैन,’ सरकारका एक मन्त्रीले भने, ‘यो समस्या हल गर्न सरकारले संसद् अधिवेशन अन्त्यको प्रस्ताव राष्ट्रपतिलाई गर्नेछ ।’ प्रतिनिधिसभाको बैठक शुक्रबारै अन्त्य गर्ने वा शनिबार पनि बस्ने मन्त्रिपरिषद्को निर्णयमा भर पर्ने संसद् सचिवालय स्रोतले जनाएको छ । सचिवालयले संसद्मा भएका कामका खेस्रासमेत तयार गरिसकेको छ ।