दलहरुले जनता झुक्याउने मात्रै गरे त्यसैले मेरो उम्मेदवारी: महर्जन

गतिविधि

- न्युज-नेपाल

काठमाडौं । काठमाडौं क्षेत्र नं ५ बाट एकीकृत शक्ति नेपालका उम्मेदवार दिपक सिंह महर्जनले विगत तीन दशकदेखि राजनीतिक दलले नेपाली जनताहरुलाई पटकपटक झुक्याएको आरोप लगाएका छन् । उनले आफ्नो विचार व्यक्त गर्दै संविधान र गणतन्त्र आए पनि व्यवहारमा परिवर्तन हुन नसकेको र जनताले त्यसको अनुभुति गर्न नसकेको आरोप लगाएका हुन् ।

सत्तामा पुगेकाहरु जनताको खुशीको लागिभन्दा पनि आफ्नै परिवार र आसेपासेहरुका लागि मात्रै काम गरेको भन्दै उनले आक्रोश व्यक्त गरे ।

आफ्नो उम्मेदवारीको कारण प्रस्ट्याउँदै महर्जन भन्छन् ‘पटक-पटक झुक्किन बाध्य भएका जनता अब झुक्किनु हुँदैन’ आसन्न निर्वाचन नेताहरुको गल्तीमाथि सजाय दिने उपयुक्त अवसर रहेको त्यसलाई सही सदुपयोग गर्न उनले मतदाताहरुलाई आग्रह गरे ।

काठमाडौँ क्षेत्र नं ५ का मतदाता सचेत र वस्तुस्थितिलाई राम्रोसँग बुझ्न सक्ने भएकाले चुनावी परिणाम सोचेभन्दा भन्दा बिलकुल फरक आउने उनले दावी गरे । शहरी क्षेत्रका नागरिकका पनि आफ्नै किशिमका समस्या हुने भन्दै उनले राष्ट्र र समाजलाई सम्पन्न बनाउन जनमुखी र आत्मनिर्भरको बाटोमा लैजाने गरी काम गर्ने बताए ।

एकीकृत शक्ति नेपालको एजेण्डामा प्रदेश संरचना खारेज गरी केन्द्र र स्थानीय तहको दुई वटामात्रै सरकार गठन गर्ने उल्लेख गरिएको छ । त्यस्तै हिन्दु, बौद्ध, किरात लगायतका धर्म संस्कृतिलाई नेपालको खास सम्पत्ति उल्लेख गरी सबैलाई समानरुपले संरक्षण र संवद्र्धन गर्ने एजेण्डामा राखिएको छ ।