नेपाल चिकित्सक संघको नयाँ नेतृत्वका लागि निर्वाचन हुँदै

राजनीति

- न्यूज नेपाल

काठमाडौं । चिकित्सकलाई यतिबेला चुनाव लागेको छ । नेपाल चिकित्सक संघको नयाँ नेतृत्वका लागि मंगलबार उम्मेदवारी दर्ताको काम सकिएको छ । विभिन्न पदमा ४१ जनाले उम्मेदवारी दर्ता गराएका छन् । डा सन्तोष पौडेल, डा शिवजीविक्रम सिलवाल र डा अनिलविक्रम कार्की तथा महासचिवमा डा सञ्जीव तिवारी, डा रक्षा श्रेष्ठ र डा अमृत भुसालको उम्मेदवारी दर्ता गराएका छन् ।

एक अध्यक्ष, एक वरिष्ठ उपाध्यक्ष, प्रत्येक प्रदेशबाट एक एक जनाको दरले सातजना उपाध्यक्ष, महासचिव एक, कोषाध्यक्ष एक, सहसचिव एक, सहकोषाध्यक्ष एक र छजना सदस्य गरी १९ जनाको पदाधिकारीको निर्वाचन हुँदैछ । त्यसैगरी संघका परिषद् सदस्य ६० जनाको समेत निर्वाचन हुँदैछ ।

वरिष्ठ उपाध्यक्ष, लुम्बिनी र कर्णाली प्रदेश उपाध्यक्ष, सहसचिव र सहकोषाध्यक्षमा एकजना उम्मेदवारको मनोनयन परेको छ । उपत्यकाबाहिर माघ ६ र ७ गते र काठमाडौँ उपत्यकामा माघ १९, २० र २१ गते निर्वाचन हुँदैछ । चिकित्सकको समय व्यवस्थापन गर्नका लागि उपत्यकाबाहिर दुई दिन र उपत्यकामा तीन दिन निर्वाचनको मिति तय गरिएको छ । निर्वाचनमा मतदाता १२ हजार आठ सय ३४ जना रहेका थिए । उपत्यकाबाहिर मतपत्र र उपत्यकामा विद्युतीय मतदान गर्ने तयारी छ ।