कानुनी हैसियत नभएको आन्दोलनका पछाडि नलाग्न सीवाईसी लघुवित्तका प्रबन्ध सञ्चालक शर्माको आग्रह

अर्थ र बाणिज्य

- न्यूज नेपाल

काठमाडौं । सीवाईसी नेपाल लघुवित्त वित्तीय संस्था लिमिटेडका प्रबन्ध सञ्चालक डोलिन्द्रप्रसाद शर्माले आन्दोलनका पछाडि नलाग्न ग्राहकवर्गमा आग्रह गर्नु भएको छ । सामाजिक सञ्जाल फेसबु्कमा स्टाटस लेख्दै उहाँले कुनै पनि कानुनी हैसियत नभएको आन्दोलनका पछाडि नलाग्न आग्रह गर्नु भएको हो ।

अहिले लघुवित्त वित्तीय संस्थाविरुद्ध आन्दोलन गर्ने समुह र आन्दोलनमा सक्रिय भएर लाग्नेहरुको सम्बन्धलाई उहाँले व्यङ्ग्यात्मक रुपले प्रस्तुत गर्नु भएको छ । प्रबन्ध सञ्चालक शर्मा सामाजिक सञ्जालमा लेख्नु हुन्छ,’अहिले लघुवित्त वित्तीय संस्थाविरुद्ध आन्दोलन गर्ने समुह र आन्दोलनमा सक्रिय भएर लाग्नेहरुको सम्बन्धलाई म यसरी ब्याख्या गर्न चाहन्छु, ‘खाईयो पिईयो धोईयो हात तिम्रो मेरो के छ साथु’ अर्थात् हिन्दीमा,’खाया पीया धोया हात तेरा मेरा क्या है साथु’, त्यसैले कुनै पनि कानुनी हैसियत नभएको आन्दोलनका पछाडि नलागी नियमित रूपमा आफ्नो किस्ता तिर्न म सबैसँग अनुरोध गर्दछु ।

मनिराम ज्ञवाली नेतृत्वको लघुवित्त संस्था विरुद्धको संघर्ष समितिले राखेका विभिन्न मागहरुको नेपाल राष्ट बैंकले सम्बोधन गरिसकेकाले आन्दोलनको औचित्य नभएको प्रबन्ध सञ्चालक शर्माले न्यूज नेपाललाई जानकारी दिनु भयो । कुनै पनि लघुवित्तले १५ प्रतिशतभन्दा बढी ब्याज लिएका भए आफूले सम्पूर्ण रकम फिर्ता गराउने शर्माले बताउनु भयो ।

यसअघि मनिराम ज्ञवाली नेतृत्वले राखेका मागहरु सम्बोधन भएपनि लघु वित्तीय संस्था विरुद्धको आन्दोलन अझै रोकिएको छैन । विभिन्न संघर्ष समिति बनाएर लघु वित्तीय संस्था खारेज गर, लघुवित्तीय संस्थाविरुद्ध एक हौं, ऋणी मार्न पाइँदैन लगायतका नारा नारा लगाउँदै पछिल्लो समय पनि आन्दोलन हुँदै आएको छ ।