‘आगमनको जाँचमा भन्सार कर्मचारी र प्रहरी दुवैलाई राखौँ’: गृहमन्त्री श्रेष्ठ

राजनीति

- न्युज नेपाल

काठमाडाैँ । त्रिभुवन अन्तर्राष्ट्रिय विमानस्थलको आगमनबाट पटक–पटक सुरक्षा त्रुटि भएपछि गृह मन्त्रालयले भन्सार कर्मचारीसँगै प्रहरी पनि खटाउने प्रस्ताव अघि बढाएको छ ।

हाल आगमन कक्ष र कार्गाेमा प्रहरीलाई चेकजाँचको अधिकार छैन ।

मन्त्रिपरिषद्मा पनि दुई साताअघि यससम्बन्धी प्रस्ताव राखेका उपप्रधानमन्त्री तथा गृहमन्त्री नारायणकाजी श्रेष्ठले यसबारे अर्थमन्त्री डा. प्रकाशशरण महतसँग पनि छलफल गरेका छन् । केही महिनाअघि भन्सार कर्मचारीकै मिलेमतोमा विद्युतीय चुरोटमा आएको सुन चोरी भएको घटनापछि मन्त्री श्रेष्ठले यस्तो प्रस्ताव अघि बढाएका हुन् ।
‘आगमनको जाँचमा भन्सार कर्मचारी र प्रहरी दुवैलाई राखौँ भनेर हामीले छलफल थालेका छौँ,’ मन्त्री श्रेष्ठले भने, ‘यसमा प्रधानमन्त्रीज्यू र अर्थमन्त्रीज्यू सकारात्मक हुनुहुन्छ, तर कार्ययोजना भने बनिसकेको छैन ।’
आगमनमा भन्सार कर्मचारीले मात्र जाँच गर्दा विगतमा सुन तथा लागुऔषधलगायत अवैध सामान भित्रिएपछि संयुक्त जाँचका लागि विगतदेखि नै प्रहरीले गृह मन्त्रालयसँग कुरा राख्दै आएको छ ।
तर, भन्सारका कर्मचारीले ‘आफ्नो भाग खोज्न खोजेको’ भन्दै असहमति जनाएका कारण विमानस्थलको सुरक्षामा पटक–पटक त्रुटि हुँदै आएको छ ।

दुवै निकाय खटिँदा एकले अर्कालाई ‘चेक एन्ड ब्यालेन्स’ पनि गर्ने भएकाले प्रहरी र कर्मचारी दुवैलाई खटाउने आवाज उठ्दै आएको छ । आगमनमा चेकजाँचको अधिकार नहुँदा विमानस्थलबाट बाहिरिएपछि मात्र प्रहरीले कतिपयलाई अवैध सामानसहित पक्राउ गर्ने गरेको छ ।

मंगलबार राजस्व अनुसन्धान विभागले बरामद गरेका सुन कार्गाेतर्फबाट पास भएको थियो । त्यहाँ लागुऔषधसम्बन्धी अनुसन्धान गर्ने केही प्रहरीमाथि खटिने गरेका छन् । सुरक्षासम्बन्धी विषयमा प्रहरीलाई पनि चेकजाँचमा राख्नुपर्ने माग प्रहरीको छ ।