‘पूर्वप्रधानमन्त्री नेपाल निर्दोष छन्’ भन्ने प्रधानमन्त्री दाहालको अभिव्यक्तिप्रति एमाले नेता ज्ञवाली आक्रोशित

राजनीति

- न्युज नेपाल

काठमाडौं । नेकपा (एमाले)का उपमहासचिव प्रदीप ज्ञवालीले प्रधानमन्त्री पुष्पकमल दाहाल ‘प्रचण्ड’को अभिव्यक्तिप्रति आक्रोश पोखेका छन् । शनिबारदेखि बुटवलमा सुरु पार्टीको लुम्बिनी प्रदेश अधिवेशनमा उनले ‘ललितानिवास जग्गा प्रकरणमा पूर्वप्रधानमन्त्री माधवकुमार नेपाल निर्दोष साबित’ भएको भन्ने अभिव्यक्तिप्रति प्रश्न उठाएका हुन् ।

प्रधानमन्त्री प्रचण्डले शुक्रबार पोखरामा आयोजित समाजवादी मोर्चाको कार्यक्रममा ‘अब नेपाललाई कसैले तर्साउन नसक्ने’ बताएका थिए । ज्ञवालीले ‘सुनपानी छर्किएर जनअदालतको अभ्यास फेरि सुरु गरिएको हो र?’ भन्दै प्रश्न गरे ।

“सामान्य टिप्पणी उठाउने खरदारलाई जेल कोचेर उहाँ जसले ललितानिवासको निर्णय गरे, उहाँहरूलाई सुनपानी छर्केर चोख्याउँदै हुनुहुन्छ । हिजो उहाँ कतै बोल्दै हुनुहुन्थ्यो– मेरो ठूलो टेन्सन सकियो, माधव नेपालजीको पनि टेन्सन सकियो,” ज्ञवालीले भने, “ए, पुष्पकमल दाहाल ‘प्रचण्ड’ज्यू, तपाईंहरूले फेरि एकचोटि जनअदालतको अभ्यास गर्न थाल्नुभएको हो र ?”

उनले नेपालको अदालतले त्यस्तो नभन्ने बताउँदै ‘सुनपानी छर्कने तपाईं को हो र ?’ भनी प्रश्न गरे । “नेपालको अदालतले त त्यस्तो भन्दैन । भर्खर अदालतमा मुद्दा दायर भएको छ । पैरवी हुन बाँकी छ । बहस, फैसला हुन बाँकी छ । तपाईं को हो, कसलाई सुनपानी छर्कने र कसलाई नछर्कने भन्ने र ?,” उनको प्रश्न छ ।

Comments

प्रकाशित मिति : 2023-09-02

Comments

अरु समाचार