भृकुटीमण्डपमा १२ गतेदेखि आठौं घरजग्गा मेला आयोजना हुँदै

अर्थ र बाणिज्य

- न्युज नेपाल

काठमाडौं । यही पुस १२ गतेदेखि १५ गतेसम्म भृकुटीमण्डपमा आठौं घरजग्गा मेला आयोजना हुने भएको हो ।

मेलामा भवन तथा संयुक्त आवास र जग्गा योजनामा आवद्ध व्यवसायी, निर्माण सामग्रीका उत्पादक तथा बिक्रेता, इन्जिनियर तथा आर्किटेक्चर कन्सल्ट्याण्टलगायत स्वदेशी तथा विदेशी प्रदर्शकका साथै बैंक र बीमा कम्पनीको समेत सहभागिता रहने नेपाल जग्गा तथा आवास विकास संघका अध्यक्ष विदुर धमलाले बताएका छन् ।

धमलाले मेलामा फर्निचर, विद्युतीय सामग्री, सिमेन्ट, सजावटका सामान, स्टिल, फर्निचर, सिसा, काठ, ढुंगालगायत निर्माण सामग्री प्रदर्शनमा राखिने बताउँदै, अहिलेको देशको आर्थिक अवस्था केही असहज भए पनि क्रेता र बिक्रेताबीच सूचना आदानप्रदान हुने र जानकारी पाइने माध्यम बन्ने उनको भनाइ छ ।

हरेक नागरिकहरुका लागि यो मेला महत्वपूर्ण रहेकाले मेलामा आएर अहिलेको घरजग्गा कारोबारहरुबारे चासो राख्न सकिने अध्यक्ष धमलाले बताए ।

मेलाको डेढ लाख मानिसहरुले अवलोकन गर्ने जनाउँदै यस वर्ष दुई अर्ब ५० करोड रुपैयाँ भन्दा बढीको कारोबार गर्ने अपेक्षा समेत आयोजकले राखेकोछ। कोरोनाका कारण केही वर्ष यता रोकिएको घरजग्गा मेला सुरु हुनुले थप सहजता थप्ने समेत उनको विश्वास छ ।