चीनद्वारा ६२ करोड बराबरको सुरक्षा सामग्री हस्तान्तरण

काठमाडौँ । चीन सरकारले सीमा क्षेत्रको सवारी साधन र लगेज जाँचका लागि आवश्यक स्क्यानर मेसिनसहित चिनियाँ तीन करोड २८ लाख अर्थात् नेपाली रुपैयाँ ६२ करोड भन्दा बढी मुल्य बराबरको सुरक्षा सामाग्री नेपाल सरकारलाई हस्तान्तरण गरेको छ ।

तातोपानी भन्सार हातमा आयोजित कार्यक्रममा नेपालस्थित चिनियाँ दूतावासका इकोनोमिक काउन्सुलर सि यू तिब्बतको नेलाम जिल्लास्थित अध्यागमन विभागका प्रमुखसहितका चिनियाँ अधिकारीहरुले भन्सार विभागका उपमहानिर्देशक रमेश अर्याललाई सामाग्री हस्तान्तरण गरे ।

चीनको आर्थिक सहयोगमा तातोपानीको लार्चा सुख्खा बन्दरगाहमा राख्नेगरी उक्त सामाग्री हस्तान्तरण भएको हो । बन्दरगाहको आधुनिक भवन तथा भन्सार यार्ड २०७६ सालमा नेपाललाई हस्तान्तरण गरिएको थियो । तातोपानी भन्सारका सूचना अधिकारी सूर्य काफ्लेका अनुसार उपलब्ध स्क्यानर मेसिनले मालबहाक कन्टेनर, साना सवारी साधन र व्यक्तिको लगेज जाँच गर्न प्रयोग गरिनेछ ।

सवारी साधन स्क्यान गर्ने मेसिन गुडाएर अन्यत्र लैजान सकिने प्रकृतिको रहेको छ । लगेज जाँच गर्ने मेसिन पनि आधुनिक मोडलको रहेको छ । उक्त मेसिनले सीमाबाट आउजाउ गर्ने सवारी साधन र व्यक्तिगत लगेज जाँचमा सहयोग पुग्ने काफ्लेले जानकारी दिए ।

तातोपानी नाकाबाट सुन भित्रने गरेको छ । साथै विगतमा लागूऔषध खासातर्फ गएका घटना भएका छन् । त्यसको नियन्त्रणमा पनि मेसिन सहयोगी हुन सक्ने भन्सार अधिकारीहरुको भनाइ रहेको छ । उक्त मेसिन सञ्चालन गर्न नेपाली भन्सारका कर्मचारीलाई चिनियाँ प्राविधिकले प्रशिक्षण दिनेछन् । मितेरी पुल पारी चिनियाँ भूभागको प्रवेशद्धारमा जडान गरेको स्क्यानर जस्तै मेसिन नेपालको भन्सारलाई उपलब्ध गराइएको हो ।

चीनले नेपालसँग भएका हरेक बैठकमा सीमा सुरक्षा र अवैध बस्तुको ओसारपसारको विषय प्राथमिकताकासाथ उठाउने गरेको छ । भन्सार अधिकृत तथा सूचना अधिकारी काफ्लेका अनुसार बन्दरगाहमा राख्न रेफ्रजेनेटर, फर्निचर, टेलिभिजन, कम्प्यूटर, बेडलगायतका कार्यालय तथा व्यक्तिगत रुपमा प्रयोग हुने सामाग्री पनि उपलब्ध गराएको छ ।

आफैंले बनाएको सुख्खा बन्दरगाहलाई आधुनिकीकरण गर्ने योजना अनुरुप उक्त सामाग्री हस्तान्तरण गरिएको हो । कोभिड र बाढीपहिरोका कारण सामान उपलब्ध गराउन ढिलाई भएको चिनियाँ अधिकारीहरुलाई उद्दृत गर्दै प्रमुख भन्सार अधिकृत दयानन्द केसीले जानकारी दिए ।

Comments