रुसद्वारा किएभमा ड्रोन, क्रुज तथा ब्यालेस्टिक मिसाइल आक्रमण

विश्व प्रवास

काठमाडौं । रुसले युक्रेनको राजधानी किएभमा ड्रोन, क्रुज तथा ब्यालेस्टिक मिसाइलद्वारा आक्रमण गरेको छ। आक्रमणमा परेर कुनै मानवीय क्षति भने नभएको बताइएको छ।

युक्रेनको वायुसेनाले सोमवार बिहान बताए अनुसार रुसले राजधानी किएभमाथि शृङ्खलाबद्ध धेरै विस्फोट भएका छन् र राजधानीका बासिन्दाहरूलाई सुरक्षित स्थानमा पठाइएको छ। किएभका मेयर भिटाली क्लिट्स्कोले आपत्कालीन बैठक किएभको होलोसिभस्की जिल्लामा बोलाइएको बताए।

‘हरेक कुराको जवाफ हुनेछ, दुश्मनले यो महसुस गर्नेछ’, आक्रमणपछि राष्ट्रपति कार्यालयका प्रमुख एन्ड्री यरमकले टेलिग्राम पेजमा पोस्ट गरेका छन्।

वायुसेनाका अनुसार रुसले किएभलाई लक्षित गर्दै ब्यालेस्टिक मिसाइल प्रक्षेपण र केही ड्रोनका साथ क्रुज मिसाइलका धेरै समूहहरू प्रहार गरेको थियो।

किएभ सहरका सैन्य प्रशासनका प्रमुख सेरही पोपकोले युक्रेनको राजधानी र यसका उपनगरहरूमा प्रहार गरिएका १० भन्दा धेरै क्रुज मिसाइल, करिब १० ब्यालेस्टिक मिसाइल र एउटा ड्रोनलाई युक्रेनको हवाई सुरक्षाले नष्ट गरेको बताए।