रोहितको सानदार अलराउण्ड प्रदर्शनमा लुम्बिनीको पहिलो जित

काठमाडौं । कप्तान रोहित पौडेलको अलराउन्ड प्रदर्शनमा लुम्बिनी लायन्सले नेपाल प्रिमियर लिग (एनपीएल)को पाँचौँ खेलमा पहिलो जित निकालेको छ ।

मंगलबार भएको पहिलो खेलमा लुम्बिनीले चितवनलाई ३३ रनले पराजित गर्दै पहिलो जित निकालेको हो। लुम्बिनीले दिएको १ सय ६८ रनको लक्ष्य पछ्याएको चितवनले निर्धारित २० ओभरमा ८ विकेटको क्षतिमा १ सय ३४ रन मात्र बनाउँन सक्यो।

चितवनलाई कम स्कोरका रोक्न लुम्बिनीका कप्तान रोहित पौडेलले चार ओभर बलिङ गरेर १७ रन खर्चिएर सर्वाधिक ४ विकेट लिए । त्यस्तै रेमोन सिमोन्डले २ विकेट लिँदा साद विन जफर र अविशेष गौतमले समान एक विकेट हात पारेका थिए ।

ब्याटिङतर्फ चितवनका वेन केनस्टाइन ३१ रन, नर बहादुर कार्की २२ रन, रिजन ढकाल २२ रन, कुशल मल्लले २० रन, रवि वोपारा १२ रन, विपिन रावल ५ रन, सन्तोष कार्की १० रन बनाए भने सोहेल तनविरले १ रन मात्र बनाउँन सफल भए ।

त्यसअघि कीर्तिपुरस्थित त्रिवि क्रिकेट मैदानमा चितवन राइनोजले टस जितेर फिल्डिङ रोजेपछि ब्याटिङ गरेको लुम्बिनीले निर्धारित २० ओभरमा ६ विकेटको क्षतिमा १ सय ६७ रनको योगफल तयार पारेको थियो।

पाँचौँ विकेटका लागि कप्तान रोहित पौडेल र साद विन जफरले १ सय १४ रनको साझेदारी गर्दै लुम्बिनीको इनिङ्स सम्हालेका थिए । लुम्बिनी एक समय ७.५ ओभरमा ४–४९ को अवस्थामा रहेको थियो।

कप्तान पौडेलले बनाएको ८० रन नै लुम्बिनीका लागि सर्वाधिक रह्यो। उनले ५७ बलमा ६ चौका र ५ छक्का प्रहार गरे। रोहितले १४.१ ओभरमा ४३ बलमा २ चौका र ३ छक्का सहयोगमा अर्धशतक पूरा गरे।

जफर ३५ बलमा ५३ रन थप्दै रनआउट भए। जफरले ३४ बलमा ४ चौका र १ छक्का सहयोगमा अर्धशतक पूरा गरे। सन्दीप जोरा ४ रनमा अविजित रहे।

ओपनर अर्जुन साउद सातौँ ओभरको पाचौँ बलमा १५ रन बनाउँदा रन्जित कुमारको बलमा कुशल मल्लको हातबाट क्याच आउट भए। ओपनर आशुतोष घिरैया दोस्रो ओभरको पहिलो बलमा रिजन ढकालको बलमा बोल्ड आउट भए।

सोही ओभरको तेस्रो बलमा उन्मुक्त चन्द रिजन ढकालको बलमा विकेट किपरको हातबाट आउट हुन पुगे। टोम मोरिस १० रन बनाउँदै कुशल मल्लको बलमा जान निकोन लफ्टी इटोनको हातबाट क्याचआउट भए।

चितवनका रिजन ढकालले तीन विकेट लिए। कुशल मल्ल र रन्जित कुमारले समान एक विकेट आफ्नो नाममा गरे। सोहेल तनविर एनपीएलको दोस्रो खेलमा विकेट विहिन भएका हुन्। तनविर यसअघि कर्णालीविरुद्धको खेलमा मात्र विकेट विहिन थिए।

मंगलबारको खेलमा लुम्बिनीले अघिल्लो खेलबाट एक खेलाडी परिवर्तन गरेको छ। वेन कटिङको स्थानमा उन्मुक्त चन्द सुरुवाती ११ मा आएका छन्। चितवनले भने अघिल्लो खेलबाट २ खेलाडी परिवर्तन गरेको छ। चितवनले हसन इसाखिलको स्थानामा लुक वेनकेस्टाइनको र दिपक बोहोराको स्थानमा नर बहादुर कार्कीलाई मौका दिएको छ।

लुम्बिनी यसअघि पहिलो खेलमा विराटनगर किंग्ससँग २ विकेटले तथा पोखरा एभेन्जर्ससँग १० विकेटको फराकिलो हार व्यहोरेको थियो। तेस्रो खेलमा सुदुरपश्चिमसँग ४५ रनले तथा चौथो खेलमा जनकपुर बोल्ट्ससँगको खेल १ रनले गुमाएको थियो।

चितवनले पहिलो खेलमा काडमाण्डु गुर्खाजलाई ५ विकेटले तथा पोखरा एभेन्जर्सलाई ८७ रनले हराएको थियो। आफ्नो तेस्रो खेलमा कर्णालीसँग भने ६ विकेटले पराजित हुँदा सुदुरपश्चिमलाई ३३ रनले पराजित गरेको थियो।

आजै हुने दोस्रो खेलमा पोखरा एभेन्जर्स र कर्णाली याक्स भिड्नेछन्। सो खेल दिउँसो १ बजे सुरु हुनेछ।

Comments