विराटनगरलाई हराएपछि काठमाडौंको प्लेअफ सम्भावना कायमै

breaking news

काठमाडौं । विराटनगर किङ्ग्सलाई एक विकेटले हराउँदै काठमाडौं गुर्खाजले नेपाल प्रिमियर लिग (एनपिएल)को आजको खेल जितेको छ ।

त्रिवि मैदान कीर्तिपुरमा आइतबार जितका लागि एक सय १८ रनको सामान्य लक्ष्य पछ्याएको काठमाडौँले १८.१ ओभरमा नौ विकेटको क्षतिमा एक सय २० रन जोड्दै लक्ष्य पूरा गरेको हो ।

लिगमा सबै सात खेल सकेको काठमाडौंले आठ अङ्क बनाएको छ । काठमाडौंका लागि प्रतिक श्रेष्ठले सर्वाधिक ३९ रन बनाए । यस्तै शंकर रानाले अविजित १६, रसिद खानले १४, जेराल्ड इरसमसले १२ र माइकल लेभिटले १० रन बनाए ।

बलिङमा विराटनगरका कप्तान सन्दीप लामिछानेले तीन विकेट लिनुका साथै चार्स सोल, अनिल खरेल र वसिर अहमदले समान दुई–दुई विकेट लिए ।

यसअघि टस हारेर ब्याटिङको निम्तो पाएको विराटनगरले १९.५ ओभरमा सबै विकेटको क्षतिमा एक सय १७ रन बनाएको थियो । विराटनगरका लागि राजेश पुलामीमगरले २५ रन बनाए । ओपनर दीपक बोहराले २०, स्कट एडवार्डले १५ र वसिर, अहमदले १३ र निकोलनस किर्तनले १२ रन बनाए।

विराटनगरलाई सस्तैमा रोक्न काठमाडौंका जेरार्ड इरास्मसले चार ओभरमा १७ रन खर्चिएर सर्वाधिक चार विकेट लिए। यस्तै दीपेश कँडेलले दुई तथा साहब आलम, करण केसी र डानियल डाउथवेटले एकएक विकेट लिए ।