सुदूरपश्चिमले पोखरालाई दियो १५४ रनको लक्ष्य

breaking news

काठमाडौं । नेपाल प्रिमियर लिग (एनपीएल) मा पोखरा एभेन्जर्सविरुद्ध सुदूरपश्चिम रोयल्सले १५४ रनको लक्ष्य प्रस्तुत गरेको छ । आइतबार कीर्तिपुरस्थित त्रिवि क्रिकेट मैदानमा टस हारेर ब्याटिङमा आएको सुदूरपश्चिमलाई निर्धारित २० ओभरमा सात विकेट गुमाएर १५३ रनको योगफल खडा गरेको हो ।

सुदूरपश्चिमका आरिफ सेखले सर्वाधिक ४२ रन बनाए । उनले ३८ बलमा दुई चौका र एक छक्का प्रहार गरे । ब्रान्डन म्याकमुलमले १६ बलमा एक चौका र दुई छक्कासहित २३ रन थपे । कप्तान दीपेन्द्रसिंह ऐरीले १६ बलमा एक चौकासहित २० रन जोडे ।

यस्तै, ओपनर विनोद भण्डारीले १४ रन थप्दा हर्मित सिंहले १३ र इशान पाण्डेले १० रन बनाए । इशान १९औँ ओभरको पहिलो बलमा ‘रिटायर्ड आउट’ भएका थिए ।

पोखराका कप्तान कुशल भुर्तेलले दुई विकेट लिए । चार ओभर बलिङ गरेका कुशलले २७ रन खर्चिए । यस्तै, रेमोन रेफर, सागर ढकाल र माइकल लियस्कले समान एक विकेट लिए ।

प्रतियोगितामा पोखराको प्लेअफ पुग्ने सम्भावना समाप्त भइसकेको छ । ६ खेलबाट चार अंक जोडेको पोखरा तालिकाको सातौँ स्थानमा छ । पाँच खेलबाट आठ अंक जोडेको सुदूरपश्चिम भने तालिकाको दोस्रो स्थानमा छ । सुदूरपश्चिमले आजको खेलमा जित निकाले प्लेअफमा स्थान सुनिश्चित गर्नेछ ।