‘केआईआईटी’ का विद्यार्थीमा त्रास कायमै, अनुहार छोपेर पत्रकार सम्मेलन

काठमाडौं । भारतको उडिसा राज्यस्थित कलिंगा इन्स्टिच्युट अफ इन्डस्ट्रियल ट्रेक्नोलोजी (केआईआईटी) मा अध्ययनरत विद्यार्थीहरुले अनुहार छोपेर पत्रकार सम्मेलन गरेका छन् । काठमाडौंमा शुक्रबार पत्रकार सम्मेलन गर्दै उनीहरूले आफूहरुमा डर कायमै रहेको जनाए। उडिसाबाट विभिन्न बाटाे हुँदै नेपाल आइपुगेका ११ जनाले चस्मा, मास्क र टोपीसहितको ज्याकेट लगाएर फरक हुलियामा पत्रकार सम्मेलन गरेका हुन् । फेरि कलेज फर्किँदा निर्मम कुटपिट हुने डरले ती विद्यार्थीहरु यस्तो हुलियामा देखिएका थिए ।

सरकारबाट आफूहरुले कुनै पनि आशा नगरेको र कलेजले यातना दिने भन्दै मास्क नखोल्ने र परिचय पनि नदिने विद्यार्थीहरुले बताएका बताएका थिए। जिल्ला प्रशासन कार्यालय पर्साका अनुसार अहिलेसम्म विभिन्न मार्ग हुँदै एक सय ५९ जना विद्यार्थी स्वदेश फिर्ता भइसकेका छन् ।

गत आइतबार दिउँसोको २ बजे भुवनेश्वरको पटिया क्षेत्रस्थित केआईआईटी विश्वविद्यालयको होस्टेलमा लम्सालको रहस्यमय मृत्यु भएपछि ५०० जना नेपाली विद्यार्थीहरुलाई निर्घात कुटपिट गर्दै विभिन्न रेल स्टेशनमा छोडिएको थियो । लम्सालको न्यायको लागि आन्दोलनरत विद्यार्थीहरुलाई तितरवितर पार्नको लागि छुट्टा–छुट्टै रेलवे स्टेशनमा छोडिएको थियो । होस्टेलमा कुटपिटमा परेका एक विद्यार्थीले चार दिन लगाएर स्वदेश फर्किएको बताए । उनले अन्य देशका विद्यार्थीहरु पनि त्यहाँ पढ्ने गरेको तर आफूहरु नेपाली भएकै कारण यस्तो अपमान सहनुपरेको बताए ।

एक विद्यार्थीले भने, “कलेजले निर्घात कुटपिट गरेको भिडियो सामाजिक सञ्जालमा भाइरल छ । त्यो भिडियो त केही पनि होइन । शिक्षकहरुले नै आफूहरुलाई गुण्डा परिचालन गरेर कोठाभित्र थुनेर कुटपिट गरे । हामीहरु सुरक्षाका लागि कलेज प्रशासनसम्म पुगेका थियौँ । तर, आफैँलाई पढाएका गुरुहरु हामीविरुद्ध आइलागे । आफैँले पढाएका गुरुहरुबाट कुटिनुपर्ने भनेपछि हाम्रो आत्मसम्मान कहाँ रह्यो ।”

विश्वविद्यालयको लापरबाहीका कारण नेपाली छात्राको मृत्यु भएको भन्दै नेपाली विद्यार्थीहरुले प्रशासनसमक्ष निष्पक्ष छानबिन गर्न माग गर्दै प्रदर्शन गर्दै आएका थिए । मृतक छात्रा बि-टेक तेस्रो वर्षमा अध्यनरत थिइन् । सोही विश्वविद्यालयका तेस्रो वर्षका मेकानिकल इन्जिनियरिङमा अध्ययरत अड्विक श्रीवास्तव साथीले ‘ब्ल्याकमेलिङ’ गर्दै यातना दिएकाले उनले आत्महत्या गरेको आशंका गरिएको छ । अर्का विद्यार्थीले आफूहरुलाई कलेज प्रशासनले पशुलाई जसरी कुटपिट गरेको बताए ।

नेपाल फर्किएका विद्यार्थीहरुले आफूहरुको पढाइको लागि सो विश्वविद्यालयमा फर्किनै पर्ने बाध्यता रहेको पनि बताए । तर, आफूहरु त्यहाँ सुरक्षित नभएको बताए । जुनसुकै अवस्थामा पनि फेरि कुटिनुपर्ने बाध्यता आइलाग्ने उनीहरुको भनाइ छ । श्रीवास्तवसहित ६ जनालाई प्रहरीले पक्राउ गरिसकेको छ । सरकारको तर्फबाट घटना मिलेको कुरा आए पनि आफूहरुसँग कुनै पनि प्रकारको वार्ता नगरेको विद्यार्थीहरुको भनाइ छ ।

मृतक लम्सालको परिवारले प्रमाणसहित उजुरी पर्दा समेत कलेजले पीडकलाई नै साथ दिँदा ज्यान गएको बताउँदै आएको छ । कलेज प्रशासनलाई अड्विक श्रीवास्तवले पटक-पटक दिइरहेको मानसिक यातनाबारे प्रमाणसहित दुईपटक उजुरी दिँदा पनि कुनै सुनुवाइ नभएको गुनासो छ ।

गत महिना विश्वविद्यालयको अन्तर्राष्ट्रिय सम्बन्ध कार्यालय (आईआरओ) लाई प्रकृतिले आफूमाथि दुर्व्यवहार भएको रिपोर्ट पनि गरेकी थिइन् । तर, विश्वविद्यालयले कुनै कारबाही अघि नबढाएपछि प्रकृतिले आत्महत्याको बाटो रोजेको भन्दै सामाजिक सञ्जालमा चर्को विरोध भइरहेको छ । सरकारको कूटनीतिक पहलपछि भने विश्वविद्यालय प्रशासनले माफी मागेको छ ।

Comments