तालिबानले निलम्बन हटाएपछि अफगान महिला रेडियो स्टेसनले प्रसारण पुन: सुरु गर्ने

काबुल । एक अफगान महिला रेडियो स्टेशनले विदेशी टेलिभिजन च्यानलसँग कथित सहकार्यका कारण तालिबानले लगाएको निलम्बन हटाएपछि प्रसारण पुनः सुरु गर्ने भएको छ । रेडियो बेगमले अमेरिकी र नाटो सैनिकहरूको अव्यवस्थित फिर्तीका बीच तालिबानले सत्ता कब्जा गर्नुभन्दा पाँच महिनाअघि सन् २०२१ मार्चको अन्तर्राष्ट्रिय महिला दिवसमा प्रसारण सुरु गरेको थियो ।

स्टेसनको सामग्री पूर्ण रूपमा अफगान महिलाहरूद्वारा उत्पादन गरिएको छ । यसको भगिनी स्याटेलाइट च्यानल, बेगम टिभी, फ्रान्सबाट सञ्चालन हुन्छ र सातौँदेखि १२ कक्षासम्म अफगान विद्यालय पाठ्यक्रम समेट्ने कार्यक्रमहरू प्रसारण गर्दछ । तालिबानले देशमा कक्षा ६ भन्दा माथिका महिला र बालिकाहरूको शिक्षामा प्रतिबन्ध लगाएको छ । शनिबार राति जारी गरिएको एक विज्ञप्तिमा तालिबानको सूचना तथा संस्कृति मन्त्रालयले रेडियो बेगमले सञ्चालन पुनः सुरु गर्न ‘बारम्बार अनुरोध’ गरेको र स्टेसनले अधिकारीहरूलाई प्रतिबद्धता गरेपछि निलम्बन हटाइएको बताएको छ ।

स्टेसनले ‘पत्रकारिताको सिद्धान्त र अफगानिस्तानको इस्लामिक इमिरेटको नियमअनुसार र भविष्यमा कुनै पनि उल्लङ्घन नगर्न’ प्रतिबद्धता जनाएको थियो । मन्त्रालयले ती सिद्धान्त र नियमहरू के हुन् भनेर विस्तृत जानकारी दिएको छैन । मन्त्रालयले प्रसारण पुनः सुरु गर्न अनुमति दिएको रेडियो बेगमले पुष्टि गरेको छ । यसले थप विवरण दिएको छैन ।

सत्ता कब्जा गरेयता तालिबानले महिलाहरूलाई शिक्षा, धेरै प्रकारका काम र सार्वजनिक स्थानहरूबाट बहिष्कृत गरेको छ । तालिबानले मिडियामाथि आफ्नो पकड कडा पार्दै जाँदा पत्रकारहरू विशेषगरी महिलाहरूले आफ्नो रोजगारी गुमाएका छन् । सन् २०२४ मा रिपोर्टर्स विदाउट बोर्डर्सको प्रेस स्वतन्त्रता सूचकाङ्कमा अफगानिस्तान १८० देशमध्ये १७८ औँ स्थानमा छ । त्यो भन्दा अघिल्लो वर्ष यो १५२ औँ स्थानमा थियो ।

सूचना मन्त्रालयले सुरुमा रेडियो बेगम कुन टिभी च्यानलसँग काम गरिरहेको भनी आरोप लगाएको थियो भन्ने खुलाएको थिएन । तर शनिबारको विज्ञप्तिमा ‘विदेशी प्रतिबन्धित मिडिया आउटलेटहरू’ सँगको सहकार्यको उल्लेख गरिएको थियो । , ११ फागुन (रासस/एपी)

Comments