साइबर अपराधको अभियोजनबारे महान्यायाधिवक्ता कार्यालयद्धारा अन्तर्राष्ट्रिय गोष्ठी आयोजना

काठमाडौं । महान्यायाधिवक्ता कार्यालयले डिजिटल युगमा भइरहेका अपराधको अनुसन्धान एवं अभियोजनबारे अन्तर्राष्ट्रिय गोष्ठी आयोजना गरेको छ । विश्वभरमै डिजिटल अपराध एक चुनौतीको विषय बनिरहँदा महान्यायाधिवक्ताको कार्यालयले यस्तो पहलकदमी गरेको हो ।

१७ देशको प्रतिनिधित्व रहेको सम्मेलनले डिजिटल अपराधको अनेकन् पक्षमा छलफल गरी सुझावसहितको निष्कर्ष निकाल्ने छ । कार्यक्रमको उद्घाटन गर्दै प्रधानमन्त्री केपी शर्मा ओलीले प्रविधिको दुरुपयोग गरी हुने सामाजिक सञ्जालको विकृति रोक्न कानुन सुधारमा जोड दिएका छन् ।

उनले ‘सामाजिक मर्यादाहरू सबै भत्काएर घृणाको फैल्याइदिने, भ्रम छरिदिने कामहरू भएका छन्, ती नियन्त्रण हुनुपर्ने’बताएका छन् । उनले सरकारले ल्याएको विधेयकबाट सामाजिक सञ्जालको अधिकार एक इन्च पनि कटौती नहुने दाबी गरेका छन् ।

त्यस्तै, कार्यक्रममा सर्वोच्च अदालतको न्यायाधीश सपना प्रधान मल्लले डिजिटल प्लेटफर्महरूबाट मुख्यतया महिलाविरुद्ध यौनजन्य अपराध एवं चरित्रहत्या हुने गरेकोमा चिन्ता व्यक्त गरेकी थिइन् । प्रविधिको विकासको राम्रो पक्षसँगै‘डार्क साइड’पनि देखिएकोले त्यसलाई नियन्त्रण गर्नुपर्नेमा उनले जोड दिएकी थिइन् ।

महान्यायाधिवक्ता रमेश बडालले बदनियत राखेर सामाजिक सञ्जालहरूमा भ्रामक सूचना दिने तथा व्यक्तिको चरित्र हत्या गर्ने क्रम बढेकोले कानूनद्वारा त्यसलाई नियन्त्रण गर्न प्रविधि, अनुसन्धान एवं पूर्वाधारमा विकास गर्न आवश्यक रहेको बताए ।

कार्यक्रम संयोजन गर्ने महान्यायाधिवक्ता कार्यालयका वरिष्ठतम नायव महान्यायाधिवक्ता डा.टेकबहादुर घिमिरेले अहिलेको डिजिटल युगमा सीमाविहीन अपराध र अभौतिक मुद्रासमेतका चुनौती बढ्दै गएको बताए । त्यस्तै डा.घिमिरेले वर्तमान साइबर कानूनमा समयानुकूल व्यापक सुधार गरी एआईको प्रयोग तथा त्यसको दुरुपयोग रोक्न हरतरहले सक्षम हुनुपर्ने धारणा राखे ।

उनले डिजिटल फरेन्सिक ल्याब स्थापना तथा डिजिटल अपराधविरुद्ध अन्तर्राष्ट्रिय सञ्जाल निर्माण गरी सहकार्य गर्न आवश्यकता रहेको औँल्याएका थिए । सम्मेलन शुक्रबार सकिनेछ । सम्मेलनको निष्कर्ष नेपाल सरकारलाई दिने योजना रहेको छ ।

Comments