पाटन संयुक्त क्याम्पसमा स्ववियु मतदान सम्पन्न, नतिजा केही बेरमा आउने

breaking news

काठमाडौं । पाटन संयुक्त क्याम्पसमा स्वतन्त्र विद्यार्थी युनियनको मतदान सम्पन्न भएको छ । आज बैशाख २० गते भएको निर्वाचनमा १,७७४ मत खसेको छ । यस क्याम्पसमा कुल ७,४९४ मतदाता रहेका छन् ।

गत चैत ५ गते भएको स्ववियु निर्वाचनमा ८५ मत खसेपछि नेविसंघलेसँग विवाद भएपछि स्थगित भएको त्रिभुवन विश्वविद्यालयको आंगिक क्याम्पसमध्ये एक पाटन क्याम्पसमा आज निर्वाचन भएको हो ।

यस क्याम्पसमा दोस्रो पटक मतदानको मिति तोकिए पनि विद्यार्थी संगठनहरुको विवादका कारण निर्वाचन रोकिएको थियो । अनेरास्ववियुका उम्मेदवारले उच्च अदालतमा रिट हालेर अन्तरिम आदेश ल्याएका कारण शनिबार मतदान भएको हो ।

आज भएको निर्वाचनमा अनेरास्ववियुका तर्फबाट तिलक कुमाल, नेविसंघबाट रोहित कपाली र अखिल क्रान्तिकारीबाट दीपक मगरको प्यानलबीच प्रतिस्पर्धामा रहेका छन् ।

विद्युतीय भोटिङ मेसिनबाट मतदान भएकाले आजै निर्वाचन परिणाम सार्वजनिक हुने निर्वाचन समितिले जनाएको छ ।