खरो आलोचना गरेका प्रचण्डसंग प्रधानमन्त्री ओलीको हार्दिकताः चर्चा एउटा विषय अर्कै !

काठमाडाैं । राष्ट्रिय राजनीतिमा अनेक शंकाहरु उब्जिएको बेला प्रधानमन्त्री केपी ओलीले नयाँ अभ्यास थालेका छन् ।

प्रमुख प्रतिपक्षी दलका नेता प्रचण्डलाई समेत प्रधानमन्त्री ओलीले संसदमा सम्बोधन गरिरहेको बेला देखाएको हार्दिकतालाई अनेक कोणबाट विश्लेषण गरिएपनि हार्दिकता र राजनीतिक रुपमा व्यवहार गरिएकोबाहेक केहि नभएको एमालेको उच्च स्रोतको दाबी छ ।

प्रधानमन्त्री ओलीले सरकारको नीति तथा कार्यक्रमको घोर आलोचना गरेर आसनतर्फ फर्किएका प्रचण्डलाई हात मिलाएर केहि समय गफ गरे । नीति तथा कार्यक्रममा आलोचना र विरोध गर्ने प्रतिपक्षी धर्म भएपनि सकारात्मक विषयलाई सहयोग गर्नुपर्ने राजनीतिक संस्कारको विकासका लागि ओलीले आफ्ना पाइला अघि बढाएका हुन् ।

‘प्रतिपक्षी भन्न वित्तिकै बोल्नै नहुने गरि राजनीतिक संस्कार विकास भएको छ । प्रधानमन्त्री ओलीले अब यस्तो तरिकाले मुलुक बन्दैन भनेरै सबैखाले राजनीतिक शक्तिसंगको सहकार्यबाट नेपाललाई समृद्ध बनाउने अठोट गर्नु भएको छ । त्यहि अनुसारको व्यवहार देखिन थालेकोमा राजनीतिक रुपमा अनर्थ लगाउने प्रयास त चलिरहन्छन् ।’ एमाले उच्च अधिकारीले न्यूज नेपालसंग भने ।

संक्रमणकालीन न्याय प्रणालीदेखि गणतन्त्रमाथि प्रश्न उठाउने प्रयास चलिरहेको बेला प्रधानमन्त्री ओलीले देशलाई एकताबद्ध र गणतन्त्रको पक्षमा रहेकाहरुलाई समेटेर अघि बढ्न खोजेका छन् । तर, कतिपयले कांग्रेस तर्साउन प्रधानमन्त्री ओलीले प्रचण्डसंग हार्दिकता देखाएको भन्दै अर्गल प्रचार गरिरहेको एमालेको आरोप छ ।

नेपालको राजनीतिमा चतुर खेलाडी ओलीले नीति तथा कार्यक्रम र बजेट प्रक्रियालाई पारदर्शी र जनतामैत्री बनाउनका लागि प्रतिपक्षीको समेत साथ लिन खोजेका छन् । कांग्रेस सभापति शेरबहादुर देउवासँग भएको ७ बुँदे सम्झाैता कार्यान्वयन गर्न संविधान संशोधनको एजेण्डालाई नीति तथा कार्यक्रममै समावेश गरिसकेपछि अब मुलुक सहज ढंगले अघि बढ्ने विश्लेषण समेत हुन थालेका छन् ।

Comments