भारतको हवाई आक्रमणपछि अहिलेसम्म के-के भए ?

काठमाडौं । भारतले गत अफ्रिल २२ मा काश्मीरको पहलगाममा भएको आतंकवादी हमलाको जवाफी कारबाही स्वरुप पाकिस्तानमाथि ‘अपरेशन सिन्दूर’ नाम दिइएको एक सैन्य कारबाही अन्तर्गत गएराति पाकिस्तानका विभिन्न स्थानमा हवाई आक्रमण गरेको छ।

एक नेपाली नागरिक सहित २६ जना पर्यटकको मृत्यु हुने गरि अप्रिल २२ मा भारत–नियन्त्रित कश्मीरमा भएको आतंकवादी हमलाको दोष पाकिस्तानमाथि लगाउँदै भारतले १५ दिन पछि पाकिस्तनमा सैन्य हमला गरेको हो ।

अन्तराष्ट्रिय सञ्चार माध्यमका अनुसार गएराति भएको हमलामा पाकिस्तानका नौ स्थानलाई लक्षित गरिएको थियो । जसमा भारतले पाकिस्तानी सैन्य इलाकामा नभएर आतंकवादीहरुको अड्मा गरिएको जिकिर गरेको छ ।

हवाई हमलाबाट अहिलेसम्म कति क्षति भयो भन्ने विषयमा दुवैदेशका स्रोतहरुले फरक–फरक दावी गरिरहेका छन् । भने, हमला पछि प्रतिक्रिया दिँदै पाकिस्तानका प्रधानमन्त्री सहवाज सरिफले भारतीय सैन्य हमलाको जवाफ दिने जनाएका छन् ।

भारतको हवाई आक्रमणपछि अहिलेसम्म भएका घटनाक्रमहरु:

– जम्मू–कश्मीरीका पहलगाममा पर्यटकहरुमाथि भएको हमलाको दुई हप्ता पछि, भारतले पाकिस्तान र पाकिस्तान प्रशासित कश्मीरका धेरै ठाउँमा हमलाहरू गरिसकेको छ। भारतले यी हमलाहरूलाई ‘अपरेशन सिन्दूर’ नाम दिएको छ।

-भारतले पाकिस्तानका ९ स्थानमा हमला गरेको दाबी गरेको छ।

-पाकिस्तानका विदेश मन्त्री इसहाक डारले आक्रमणमा ८ जना पाकिस्तानी नागरिकको मृत्युको भएको र ३५ जना घाइते भएको पुष्टि गरेका छन्।

-कश्मीरमा पाकिस्तानी सेनाको गोलीबारीमा तीन जना भारतीय नागरिकको मृत्यु भएको छ।

-पाकिस्तान र भारतले धेरै क्षेत्रमा स्कूल र कलेज बन्द गरेका छन्।

-भारतको सैन्य अपरेशनपछि एयर इन्डिया, स्पाइसजेट र इन्डिगोजस्ता प्रमुख एयरलाइन्सहरूले प्रभावित क्षेत्रका उडानहरू स्थगित गरेका छन् ।

Comments