पुटिनको प्रत्यक्ष वार्ता प्रस्तावको जेलेन्स्कीले गरे स्वागत

Breaking News

किएभ । युक्रेनी राष्ट्रपति भोलोदिमिर जेलेन्स्कीले रुसी राष्ट्रपति भ्लादिमिर पुटिनले प्रत्यक्ष वार्ताका लागि गरेको प्रस्तावको स्वागत गर्नुभएको छ ।यसअघि पुटिनले रुस–युक्रेनबीच दिगो शान्ति स्थापना र युद्धको समाधानका लागि प्रत्यक्ष वार्ताको प्रस्ताव गर्नुभएको थियो । पुटिनले बिहीवार टर्कीको इस्तानबुलमा प्रत्यक्ष वार्ताको प्रस्ताव गर्नुभएको छ ।

आज सामाजिक सञ्जाल एक्समा लेख्दै जेलेन्स्कीले प्रस्तावको स्वागत गर्नुभएको हो । उहाँले पुटिनको प्रस्तावबारे प्रत्यक्ष रूपमा उल्लेख नगरे पनि रुसीहरूले अन्ततः युद्ध समाप्त गर्नेबारे विचार गर्न शुरू गरेको कुरा एक सकारात्मक सङ्केत रहेको उल्लेख गर्नुभएको छ । जेलेन्स्कीले युद्धलाई साँच्चै समाप्त गर्ने हो भने युद्धविराम हुनुपर्ने पनि बताउनुभयो ।

रुस–युक्रेन युद्धविरामको मध्यस्थता अमेरिकाले गरिरहेको छ । अमेरिकी राष्ट्रपति डोनाल्ड ट्रम्पले सार्वजनिक रूपमा र निजी रूपमा युद्धविरामका लागि दुवै देशलाई दबाव दिँदै आउनुभएको छ । पुटिनले युक्रेनलाई नेटोमा आबद्ध गर्न नहुने, सेना सीमित गर्ने र अहिलेसम्म रुसले कब्जा गरेको युक्रेनी भूभाग मात्रै नभएर आफ्नो नियन्त्रणमा नभएका भागहरूको पनि स्वामित्व हुनुपर्ने माग गर्दै आउनुभएको छ ।