जन्ते भोज खाँदा १०० भन्दा बढि जन्ती अस्पताल भर्ना !

खाजामा बुनियाँ, रसबरी लगायतका मिठाइ खाँदा सबै बिरामी भएका हुन्

प्रदेश

काठमाडौं । मधेश प्रदेशको धुनषा जिल्लामा घनुषाधाममा बिहे भोजमा खाजा खाँदा सय जनाभन्दा बढी बिरामी भएका छन् । जिल्लाको मिथिला विहारी नगरपालिका–८ ठेरा कचुरीका नरेश महराको छोरीको बिहेमा भोज खाँदा जन्तीसहित सय जना भन्दा बढी बिरामी जिल्ला जनस्वास्थ्य कार्यालय धनुषाले जनाएको छ ।

कार्यालय प्रमुख उमेश यादवका अनुसार राति जनकपुर उपमहानगरपालिका–२३ बिन्धीबाट ठेरा कचुरीमा जन्ती पुगेको थियो । स्वयम्बर सकिए लगतै खाजामा बुनियाँ, रसबरी लगायतका मिठाइ खाँदा सबै बिरामी भएका हुन् ।

खाजा खाएलगतै पेट दुख्ने, बान्ता हुने, कमजोर हुने क्रम चलेको घटनास्थलमा परिवारजन र बिरामीसँगको प्रतिक्रियापछि थाहा भएको प्रमुख यादवले जानकारी दिए । ४५ जना भन्दा बढी प्रादेशिक अस्पतालमा भर्ना भएको र अन्यको नजिकको क्लिनिक तथा अन्य अस्पतालमा उपचार भइरहेको प्रमुख यादवले बताए । केही भने उपचारपश्चात निको भएर घर समेत फर्किएका छन् ।

‘खाजामै प्वाइजन भएर बिरामी परेको हाम्रो अनुमान छ । घटनास्थल पुगेर हामीले खाजाको स्याम्पल ल्याएका छौं । ल्याबमा परीक्षण गरेर के कारणले भएको हो भन्ने पुष्टि हुन्छ,’ यादवले भने ।