रुस-युक्रेन युद्ध आज ११७४ दिन पूरा: ७३ नेपालीको मृत्यु, ५० जनाको रिपोर्ट आउँन बाँकी

काठमाडौं । २४ फेब्रुअरी २०२२मा सुरु भएको रुस युक्रेन युद्धबिचको युद्ध आज ११७४ दिन पूरा भएको छ । उक्त भयानक युद्धमा लाखौं सैनिक तथा आम सर्वसाधारण, बालबालिका लगायतको मृत्यु भइसकेको छ । त्यस्तै सोहि युद्धमा रूसी सेनामा भर्ती भएर युक्रेन युद्धमा संलग्न ७३ जना नेपालीको मृत्यु पुष्टि भएको छ ।

मस्कोस्थित नेपाली दूतावासले परराष्ट्र मन्त्रालयलाई जानकारी गराउँदै युद्ध मोर्चामा खटिएका थप २३ जना नेपाली नागरिककोको मृत्यु भएको पुष्टि गरे सँगै उक्त युद्धमा मारिने नेपालीको संख्या ७३ जना पुगेको हो ।

दुतावासले बताए अनुसार गत पुस ९ यता थप २३ जनाको मृत्यु भएको परराष्ट्र मन्त्रालयले जनाएको छ । रूस–युक्रेन युद्धमा बेपत्ता भई डीएनए परीक्षणका लागि नमुना पठाएकामध्ये अझैं ५० जनाको रिपोर्ट आउनै बाँकी छ ।

दूतावासले मन्त्रालयमा पठाएको विवरणअनुसार पछिल्लो पटक मृत्यु हुनेमा नवलपरासीका हेमकुमार मगर, दार्चुलाका ललितसिंह डोबल, सल्यानका ताराप्रकाश घर्ती, संखुवासभाका रामकृष्ण अधिकारी, कास्कीका गीतबहादुर घर्तीमगर, बागलुङका मख्खनबहादुर पुन रहेका छन् ।

यस्तै मकवानपुरका रामकुमार प्रधान, मोरङका रोनल मिश्र, प्यूठानका भीमबहादुर घर्तीमगर, म्याग्दीका छमबहादुर घर्ती, बैतडीका अर्जुनदत्त भट्ट, सुर्खेतका सुजन शर्मा र रुकुम पश्चिमका रामकुमार बुढामगरको पनि मृत्यु भएको छ ।

ठेगाना नखुलेका अन्य १० जनामा लरबहादुर बुढा, नेत्रबहादुर थापा, विकास राई, रूपक राई, महेन्द्र मल्ल, अशोक जीसी, अमृत थापा आलेमगर, उदयराज थारू, प्रितम राई र प्रेमबहादुर लुंगेलीमगर छन ।

कन्सुलर विभागले मृत्यु प्रमाणित भइसकेकाका परिवारलाई सम्पर्क गरी जानकारी दिएको छ । उनीहरू एक वर्षदेखि परिवारको सम्पर्कमा थिएनन् । रूसले गत वर्षको चैतदेखि नै रूसी सेनामा कार्यरत नेपाली नागरिकको पहिचानका लागि पारिवारिक सदस्यको डीएनए नमुना पठाउन भनेको छ ।

Comments