आज नेपाली क्रिकेट टोलीले १०० औं टी-२०आई खेल्दै, यस्ता छन् किर्तिमान….

काठमाडौं । त्रिकोणात्मक टी–२० सिरिजको पहिलो खेलमा नेपाल आज नेदरल्यान्ड्ससँग खेल्दैछ ।

सोमबार स्कटल्यान्ड भ्रमणमा रहेको नेपालले सिरिजको पहिलो खेल नेदरल्यान्ड्ससँग खेल्न लागेको हो । नेपाल र नेदरल्यान्ड्सको खेल नेपाली समय अनुसार आज साँझ ७ः४५ बजे सुरु हुनेछ ।

सिरिजको उद्घाटन खेलमा आइतबार आयोजक स्कटल्यान्डले नेदरल्यान्ड्सलाई ३९ रनले हराएको थियो ।

टी–२० सिरिजका लागि नेपाल क्रिकेट सङ्घ (क्यान) रोहित पौडेलको कप्तानीमा नेपाली १६ सदस्यीय टोली रहेका छन् ।

सोमपाल कामी र गुलसन झा अभ्यासको क्रममा घाइते हुँदा यो सिरिजमा किरण ठगुन्ना, लोकेश बम र रुपेश सिंहले अवसर पाएका छन् ।

१००औं टी-२०आई खेल्दै

नेपाली क्रिकेट टोलीले आज आफ्नो १००औं टी–२० अन्तर्राष्ट्रिय खेल खेल्दै छ । स्कटल्याण्ड टी-२०आई शृंखलाअन्तर्गत नेदरल्याण्ड्ससँगको खेल नेपालको १००औं टी-२०आई खेल हुनेछ ।

सन् २०१४ मा आईसीसी टी-२० विश्वकपमार्फत अन्तर्राष्ट्रिय स्तरको क्रिकेट यात्रा सुरु गरेको नेपालले त्यसयता ९९ वटा टी-२० आई खेलेको छ ।

नेपालले उक्त समय हङकङसँगको खेल खेल्दै टी-२०आई यात्रा सुरु गर्दा जित हासिल गरेको थियो । त्यसपछि बंगलादेशसँग पराजित भएको नेपालले अफगानिस्तानलाई हराएको थियो।

पहिलो टी-२० आई टोलीमा रहेका एक खेलाडी मात्र हालसम्म टोलीमा

नेपालको पहिलो टी-२० आई टोलीमा रहेका एक खेलाडी मात्र हालसम्म टोलीमा छन् । त्यसबेला खेलेका पेस बलर सोमपाल कामी हालसम्म पनि टोलीको महत्वपूर्ण हिस्सा रहँदै आएका छन् । यद्यपी यस शृंखलामा भने उनी चोटका कारण उपलब्ध हुने छैनन् ।

नेपालले टी-२०आईमा ५५ जित 

हालसम्म नेपालले खेलेका ९९ टी-२०आईमा ५५ जित निकालेको छ भने ३९ मा हार बेहोर्दा २ खेल बराबरी भएको छ । ३ खेल नतिजाविहीन छ।

नेपालका लागि टी-२०आईमा सर्वाधिक रन दिपेन्द्रसिंह ऐरीले बनाएका छन् । उनले ७८ खेलमा १७५६ रन बनाएका छन् । त्यस्तै कुशल भुर्तेलले ५७ खेलमा १४२० रन बनाएका छन् । कप्तान रोहित पौडेलले १३५८ र आसिफ शेखले १३५२ रन बनाएका छन् ।

बलिङमा सन्दीप लामिछानेले सर्वाधिक १०८ विकेट लिएका छन् । त्यसपछि करण केसीले ९९ विकेट लिएका छन् । आजको खेलमा उनलाई १००औं विकेट लिने मौका पनि छ ।

नेपालको सबैभन्दा ठुलो योगफल

नेपालको सबैभन्दा ठुलो योगफल ३१४ रनको छ । २७ सेप्टेम्बर २०२३ मा मङ्गोलियाविरुद्ध हाङ्झोउमा सम्पन्न एसियन गेम्सको खेलमा बनाइएको उक्त योगफल टी-२०आई इतिहासमा पहिलोपटक ३०० भन्दा बढी रन बनेको क्षण थियो ।

त्यसबेला सर्वाधिक टी-२० योगफलको कीर्तिमान कायम भएपनि हाल यो तोडिइसकेको छ । सोही खेलमा नेपालका ब्याटर कुशल मल्लले १३७ रन बनाएका थिए जुन् नेपालका लागि टी-२०आई मा कुनैपनि ब्याटरले बनाएको सर्वाधिक स्कोर हो ।

पाँच ब्याटरले टी-२०आईमा शतक

हालसम्म नेपालका पाँच ब्याटरले टी-२०आईमा शतक बनाएका छन् । सबैभन्दा पहिलो शतक पारस खड्काले सन् २०१९ मा सिंगापुरविरुद्ध बनाएका थिए । त्यसपछि कुशल भुर्तेलले फिलिपिन्सविरुद्ध, कुशल मल्लले मंगोलियाविरुद्ध बनाएका छ्न् । दिपेन्द्रले मलेसियाविरुद्ध तथा ज्ञानेन्द्र मल्लले भुटानविरुद्ध शतक बनाएका छन् ।

सबैभन्दा कम योगफल ५३ रन

टी-२०आईमा नेपालको सबैभन्दा कम योगफल ५३ रनको छ, १३ जुलाई २०१५ मा आयरल्यान्डविरुद्ध बेलफास्टमा भएको विश्वकप छनोट खेलमा नेपालको खराब प्रदर्शन थियो ।

अविनाश बोहराले माल्दिभ्सविरुद्ध ११ रन मात्र दिएर ६ विकेट लिएको नेपालको टी-२०आईमा उत्कृष्ट बलिङ प्रदर्शन हो ।

दिपेन्द्रको ९ बलमा अर्धशतक

यसबाहेक दिपेन्द्रसिंहले एसियन गेम्सकै खेलमा ९ बलमा अर्धशतक बनाएका छन् जुन् रेकर्ड तोडिँदैन केवल बराबर मात्र हुन सक्छ । उनले एकै ओभरमा ६ छक्का प्रहार गरेको रेकर्ड पनि बनाएका छन् ।

Comments